«DÚNIEJÚZILIK ISLAM ǴULAMALARYNYŃ JOǴARY KEŃES SAMMITI» QORYTYNDYLANDY

Búgin Túrkııanyń Ystambul qalasynda eki kúnge jalǵasqan «Dúnıejúzilik ıslam ǵulamalarynyń joǵary keńes sammıti» qorytyndylandy.

Halyqaralyq jıynǵa Qazaqstan musylmandary dinı basqarmasynyń tóraǵasy Naýryzbaı qajy Taǵanuly,  musylman elderiniń birqatar múftıleri men din ǵalymdary qatysty. Sammıttiń plenarlyq otyrysynda Bas múftı Naýryzbaı qajy Taǵanuly baıandama jasap, Qazaqstan musylmandary dinı basqarmasynyń Palestına máselesine qatysty ustanymyn jetkizdi ári álem halqyna tynyshtyq pen beıbit zaman tiledi. 

Aıta keteıik, 13-14 mamyr kúnderi ótken halyqaralyq basqosýda musylman áleminiń qazirgi tańdaǵy ózekti máseleleri, sonyń ishinde Palestına musylmandary, Ǵazza turǵyndarynyń qazirgi jaǵdaıy keńinen talqylandy. Sammıt qorytyndysynda delegattar Úndeý qabyldady.

Sondaı-aq dál osy sammıtke qatysýshy delegattardy Túrkııa Prezıdenti Rejep Taıyp Erdoǵan arnaıy qabyldap, qonaqasyn berdi. 

​