MEDRESE-KOLLEDJ STÝDENTTERI ARASYNDA RESPÝBLIKALYQ OLIMPIADA BASTALDY (FOTO)
Búgin Qazaqstan musylmandary dinı basqarmasynyń uıymdastyrýymen elimizdegi medrese-kolledj stýdentteri arasynda respýblıkalyq olımpıada bastaldy.
Olımpıadanyń ashylý saltanatynda QMDB Tóraǵasynyń orynbasary, naıb múftı Sansyzbaı qajy Qurbanuly sóz sóılep, qatysýshy stýdentterge sáttilik tiledi.
Shákirtterdiń bilimi synǵa túsetin dodaǵa elimizdiń 9 medrese-kolledjinen kelgen eń úzdik 36 shákirt qatysyp jatyr. Ekinshi jáne úshinshi kýrsta oqıtyn olar jas ereksheligine qaraı eki topqa bólinip, saıysqa túsýde.
«Baıqaý eki kezeńnen turady. Búgin arab tili, fıqh, Islam tarıhy pánderinen test tapsyryp, ár kýrstan alty qatysýshy irikteldi. Erteń ekinshi kezeńde olar Quran Kárim súrelerin jatqa oqyp, suraqtarǵa jaýap beredi. Sonymen qatar, arabsha klassıkalyq mátinderdi hareketsiz oqıdy jáne arab tilinde sóıleý deńgeıi tekseriledi. Bilim jarysyna Qazaqstan musylmandary dinı basqarmasy men «Hýsamýddın ás-Syǵanaqı» ınstıtýtynyń ustazdary qazylyq etýde. Olımpıadany ótkizýdegi maqsatymyz – tájirıbe almasý, bilim berý sapasyn arttyrý» deıdi QMDB Dinı bilim jáne kadr daıarlaý bóliminiń meńgerýshisi Hasan Amanqul.
Aıta keteıik, dástúrli túrde altynshy ret ótip otyrǵan Olımpıadada jeńimpaz bolǵan úshinshi kýrs stýdentine Umra qajylyǵyna joldama beriledi. Ekinshi, úshinshi oryn alǵan shákirtterge aqshalaı syılyq tabystalady. Júldeger bolǵan ekinshi kýrs stýdentteri de qarjylaı syılyqpen marapattalmaq.
