БОЗДАҚТАРЫМЫЗДЫҢ РУХЫ ШАТ БОЛҒАЙ

Наурызбай қажы ТАҒАНҰЛЫ,

Қазақстан мұсылмандары діни
басқармасының төрағасы, Бас мүфти
  

Құрметті қауым!
 

Халқымыз 31 мамыр күні саяси қуғын-сүргін және ашаршылық құрбандарын еске алып, боздақтардың рухына қасиетті Құран аяттарын бағыштайды. Бұл – зұлмат заман мен зобалаң нәубетті жылдардан сабақ алатын сәт.

Талай тауқымет пен зұлмат заманды көрген ұлтымыз сындарлы сәттерде рухын түсірмей, ынтымағын ыдыратпай, тәуелсіз ел болуға ұмтылды. Аллаға шүкір, кешегі бабаларымыздың аңсаған арманы бүгін шындыққа айналды.

Бүгінде елімізде Мемлекет басшысы Қасым-Жомарт Тоқеавтың бастамасымен зұлымдықтың құрбаны болған азаматтарды толық ақтау, оларға қатысты тарихи әділдікті қалпына келтіру жұмыстары қарқынды жүруде. Қуғын-сүргін құрбандарын толық ақтау бағытындағы сауапты іске дін қызметкерлері де орасан үлес қосып келеді.

Бүгін еліміздегі дін қызметкерлері азалы күндерде ажал құшқан ата-бабаларымыздың рухына арнайы Құран аятын бағыштап, дұға жасауда. Жаратушы Иеміз ізгі ниетіміз бен игі амалымызды қабыл еткей. Алла Тағала боздақтарымызды панасына алып, рухын шат еткей. Әмин.

Дереккөз: ҚМДБ Баспасөз қызметі