Биылғы тоқтылар құрбандыққа жарамайды

Құрбан айтқа санаулы күндер қалды. Алланың разылығынан үміттенген жандар құрбандыққа соятын малды таңдауда өте мұқият болу қажет. Құрбандықтың Алланың құзырында қабыл болуының мұсылман үшін маңыздылығын ескерсек, бірінші ықылас-ниет дұрыс болуы, екінші сойылатын  мал жарамды болуы керек. 

Мүфтияттың ресми сайтында: «Ешкінің және қойдың жасы бір жылдан асып екінші жылға кіргені, сондай-ақ алты айлық марқа қозы (үлкен қой секілді) ірі, қоңды болса құрбандыққа жарамды. Сиырдың екі жасқа толып, үшінші жылға кіргенін, ал түйеден жасы бес жылдан асып, алтыншы жылға кіргенін құрбандыққа шалуға болады. Сонымен қатар сойылатын малдың кемшілік, кінәраты болмауы керек», – делінген (fatua.kz) 

Қойдың бір жасы шамамен 6 ай. Себебі, саулықтарының буаздық мерзімі 145 – 155 тәулікке созылады, яғни орташа есеппен 5 ай 10 күн (kk.m.wikipedia.org). Сол үшін шариғатта алты айдан асқан тоқты құрбандыққа жарамды делінген. 

Осы орайда ескерткім келгені, биылғы тоқтылардың барлығы бірдей құрбандыққа жарамайды. Өйткені, тоқтының жасы кем дегенде алты айдан асқан және ірі  болуы шарт. Дәлірек айтқанда, ағымдағы жылдың наурыз айына дейін туылған төл болуы тиіс. Еліміздің бірқанша өңірлерінде сақман сәуір айында басталатыны белгілі. Әсіресе, орталық және солтүстік аймақтарда.

Сондықтан, құрбан малын сатушылар мен тұтынушылар осыны ескерсе екен деймін. 

Келе жатқан Құрбан айт құтты болсын! Құрбандықтарыңыз қабыл болсын! «Ешбір құл құрбан күні Алланың құзырында құрбандық қанын ағызғаннан артық жақсы амал жасай алмайды. Өйткені, шалынған малдың мүйізі, қылы және тұяқтары қиямет күні мол  сауап әкеледі. Шалынған құрбандықтың қаны жерге ақпастан бұрын Алланың құзырында жоғары мәртебеге жетеді. Олай болса, шын көңілмен құрбан шалыңыз» (xадис).

 

Ершат ОҢҒАРОВ
ҚМДБ Ғұламалар кеңесінің xатшысы,
Теолог, PhD

Ершат Оңғаров
date30.08.2017readCount840printБасып шығару