«АЙБИКЕ» КЛУБЫ: ҚЫЗДАР АРАСЫНДА ЖҮГІРУДЕН МАРАФОН ӨТТІ (ФОТО)

ҚМДБ Астана қаласы өкілдігіне қарасты «al-Fattah» мешітінің «Айбике» қыз-келіншектер клубы мешіттің әйел шәкірттері арасында жүгіруден марафон ұйымдастырды.

Аталмыш игі шара Астана қаласы әкімдігінің қолдауымен жүзеге асып отыр. Әйел жамағаты арасында «Тәні саудың – жаны сау» тәмсілі аясында спорттық шараларды өткізіп отыру клубтың тағы бір бағытына жатады.

Сайыстың ашылу рәсімінде «al-Fattah» мешітінің наиб имамы Бақытжан Өткелбаев сөз сөйлеп, қатысушы жамағаттарға сәттілік тіледі. 30 шақты адам қатысқан марафонға еңкейген қарттан бастап жасөспірім қыздар да атсалысты. Атап айтсақ, 12 жастағы шәкірттер мен 50 жасты алқымдаған әжелер де 5 км қашықта жүгіріп, бар өнерін ортаға салды.

Барлық қатысушылар арнайы медальдармен марапатталып, жүлделі 3 орынға 50 000, 30 000, 20 000 теңге көлемінде сыйақы берілді.

Сайыс соңынан әйел шәкірттердің басқосуы табиғат аясындағы дастархан айналасында жалғасты. «Айбике» клубының жетекшісі Зарина Шамидоллақызы жиналған жамағатқа уағыз-насихат айтып, қатысушыларға өз ризашылығы мен алғысын біллдірді.