ЕЛОРДАДА І РЕСПУБЛИКАЛЫҚ УАҒЫЗШЫЛАР ФОРУМЫ БАСТАЛДЫ (ФОТО)

Бүгін елордада Қазақстан мұсылмандары діни басқармасының ұйымдастыруымен «Қазақ қоғамында уағыз айтудың әдебі мен мәдениеті» тақырыбында І республикалық уағызшылар форумы басталды.

Форумға ҚМДБ Төрағасы, Бас мүфти Наурызбай қажы Тағанұлы, Мәдениет және ақпарат вице-министрі Қанат Ысқақов, облыс бас имамдары мен РАНТ, ЖАНТ мүшелері, әйел ұстаздар, мүфтият қызметкерлері мен БАҚ өкілдері қатысуда.

Іс-шара Қазақстан Республикасының Мемлекеттік Әнұраны және Құран аяттарын оқумен басталды. Сондай-ақ Діни басқарма атқарған іс-шаралар жөнінде арнайы бейнеролик назарға ұсынылды.

«Имам – қоғамды тәрбиелеуші тұлға, ағартушы ұстаз. Отаншыл, аманатқа адал, адамгершілігі мол иманды ұрпақ тәрбиелеуде имамның атқаратын рөлі ерекше. Аллаға шүкір, халқымыздың рухани дамуына, қоғамда отбасы құндылығының артуына ағартушы ұстаздар мен дін қызметкерлері үлкен үлес қосып келеді. Біз бүгінгі форумда «Уағыз айтудың әдебі мен мәдениеті» құжатын қабылдаймыз. Аталған тағылымды құжат дін қызметкерлеріне үлкен жауапкершілік жүктейді деп санаймыз» деді Бас мүфти Наурызбай қажы Тағанұлы.

Айта кетейік, алғаш рет өтіп отырған уағызшылар форумына 200-ден астам дін қызметкері қатысуда. 

​

Дереккөз: ҚМДБ Баспасөз қызметі