ҚМДБ АСТАНА ҚАЛАСЫ ӨКІЛДІГІНІҢ ИМАМДАРЫМЕН ҰЛТТЫҚ КИІМ КҮНІ НАСИХАТТАЛДЫ (ФОТО)

Бүгін Қазақстан мұсылмандары діни басқармасы Астана қаласы өкілдігіне қарасты мешіт имамдары мен ұстаздары 18 наурыз – Ұлттық киім күнін атап өтіп, аталмыш игі бастаманы қоғам арасында насихаттады.

Ұлттық оюлар мен әшекейлер арқылы безендірілген дәстүрлі киім үлгілерін киіп, төл мерекенің шырайын ашуға үлестерін қосты. Әйелдер жамағаты да бұл шарадан қалыс қалған жоқ. Сәнді де қарапайым, қазақы көріністерімен берекелі мерекенің сәнін кіргізді. 

Айта кетсек, бүгін Қазақстан мұсылмандары діни басқармасының төрағасы Наурызбай қажы Тағанұлы дін қызметкерлеріне өткізген жиналыста Наурыз мерекесін дәріптеуге назар аударды.

«Өздеріңізге белгілі Мемлекет басшысы Қасым-Жомарт Кемелұлы Атырауда өткен Ұлттық құрылтайда Наурыз мерекесі мен Ислам құндылықтары өзара үндесетінін атап өтті. Президенттің Жарлығымен биылдан бастап елімізде әз-Наурыздың онкүндігі жарияланды. Бүгін, яғни 18 наурыз – Ұлттық киім күні. 19 наурыз – Жаңару күні. 20 наурыз – Ұлттық спорт күні. 21 наурыз – Ынтымақ күні. 22 наурыз – Жыл басы. 23 наурыз – Тазару күні. Біз осы бағытта ақпараттық, уағыз-насихат жұмыстарында белсенді жұмыс жасауымыз керек» деді Наурызбай қажы Тағанұлы.