Ұлыстың ұлы күніне орай Бас мешітте мерекелік шара өтті (ФОТО)

Ұлыстың ұлы күні – Әз Наурыз мейрамына орай Нұр-Сұлтан қаласындағы республикалық «Әзірет Сұлтан» мешітінде мерекелік шара ұйымдастырылды. Ұлттық мерекеге орай мешіт ауласына казақ үйлер тігіліп, жамағат арасында ұлттық спорт түрлерінен сайыс өткізілді.

Бесін намазынан соң мешіт ауласында бас қосқан жамағат арасында ләңгі тебу, бұқа тартыс, гір көтеру және қол күрестіру ойындары ойнатылып, жеңімпаздарға естелік сыйлықтар берілді.

Мешіт ауласындағы мерекелік шараға ҚМДБ төрағасы, Бас мүфти Наурызбай қажы Тағанұлы және Нұр-Сұлтан қаласы әкімінің орынбасары Берік Жәкенов сынды құрметті қонақтар қатысып, жамағатты Наурыз мерекесімен құттықтады. Нұр-Сұлтан өкілдігі Әйел-қыздар секторының ұйытқы болуымен бой көтерген қазақ үйге бас сұғып, ұлттық тағамдарымызға тұнып тұрған мерекелік дастарханнан дәм татты. Ұлыстың ұлы күніне орайластырылған тұсаукесер рәсіміне қатысып, сәбидің құлағына азан шақырып, есімін қойды. Бас мүфти Наурызбай қажы Тағанұлы сәбиге ақ батасын беріп, Ұлыстың ұлы күнінде салт-дәстүріміз ұлықталды. Дастархан басында қазақы қара домбыра күмбірлеп, ән мен жырдан шашу шашылды.

Суреттерді «ФОТОГАЛЕРЕЯ» айдарынан көре аласыздар!

 

Дереккөз: Muslim.kz