«ӘЛ-ҒАНИ» МЕШІТІНДЕ БЕЙІМБЕТ МАЙЛИННІҢ 130 ЖЫЛДЫҒЫНА ОРАЙ ЖИЫН ӨТТІ (ФОТО)

ҚМДБ Астана қаласы өкілдігіне қарасты «Әл-Ғани» мешітінде «Ихсан және насихат» бағыты бойынша қазақтың асыл азаматы, классик жазушысы  – Бейімбет Майлиннің 130 жылдығына орай арнайы ас беріліп, рухына дұға бағышталды.

Шара барысында мешіттің наиб имамы, РАНТ мүшесі Ғазиз Ахмет Бейімбет Майлин атамыздың өмірбаяны, оның ел үшін жасаған ерен еңбектері мен жанкештілігі жайлы кеңінен дәріс оқыды. Сол кездегі жалған жаланың жалыны тек атамызды ғана емес, оның жары Гүлжамал апамызды да балаларын да шарпып өткенін тілге тиек етті. 

Жиын соңында шейіт кеткен баба рухына Құран Кәрім аяттары оқылып, дұғалар бағышталды.

Сталиндік репрессияның құрбандары болған алыптар бүгінде қайта тірілгендей. Жендеттер Алаш зиялыларын өз заманында «халық жауы» деп қуғынға ұшыратып, ұрпағымен жер бетінен жоқ қыла жаздаса да, халық санасынан жоғалта алмады. Біз – олардың ұрпағымыз. Тұлғалар салып кеткен сара жол – бізге аманат.