Неліктен тозақ тұрғындарының көбі әйелдер?

Кейде біз өзімізге үнемі жақсылық жасап жүрген бір адамның кенет бізге бір зиян тигізгенін көрсек, оның бұған дейін жасаған барлық жақсылықтарын ұмытып кетеміз. Оған деген сүйіспеншілік пен қадір-құрмет сол сәтте-ақ құлдырап сала береді. Ардақты Пайғамбарымыз (оған Алланың игілігі мен сәлемі болсын): «Мен сенен ешқашан жақсылық көрген жоқпын», - дейтін әйелдерге ескерту жасап, бұл мінездің түбі жақсылыққа апармайтынын айтқан. Себебі, бұл сипат әйелдің шүкірсіздігіне, қанағатсыздығына алып келеді. Әйел адам күйеуінің әрбір жақсылығына алғыс айтып тұру керек. Бұл - отбасылық өмірдің ең маңызды аспектісі.

Бірде Пайғамбар (оған Алланың игілігі мен сәлемі болсын): «Маған тозақ көрсетілді де, мен оның көпшілік тұрғындары күпірлік (бұл сөз иман мәселелерімен байланысты емес) танытқан әйелдер екенін көрдім», – дейді. Сахабалар одан: «Олар Аллаға күпірлік еткен бе?» – деп сұрайды. Ол: «Жоқ, олар өздерінің күйеуіне қатысты күпірлік көрсететін. Олар күнде жақсылық жасап жүрген күйеуінің бойынан кенет өзіне ұнамайтын бірдеңе көре қалса, міндетті түрде: «Мен сенен ешқашан еш жақсылық көрмедім» дейді», – деп жауап береді[1].

Имам Ибн Хәжар әл-Хайтами «Тозақ тұрғындарының көбісі – әйелдер...» деген хадис жайлы былай деген: «Мұның себебі – олар Аллаға, Оның Елшісіне (оған Алланың игілігі мен сәлемі болсын) және өздерінің күйеулеріне аз мойынсұнады, сондай-ақ үйден шығарда әрленіп, әтірленіп адамдарды азғыруға салады» («әз-Зәуажир») Ал келесі бір хадисте: «Өзінің күйеуіне тәуелді бола тұра, оған рахметін білдірмейтін әйелге Алла қарамайды» - делінген[2].

Ендеше, күйеуіңіздің бар болғанына және сіз үшін істеп жатқан аз-кем жақсылықтарының барлығына риза болып, оны алғысқа көмуден жалықпаңыз. Күйеуіңізге риза болағаныңыз – Алланың жазғанына, тағдырына разы болғаныңыз. Сізден де жағдайы төмен адамдарға қараңыз да оны жегідей жей бермеңіз. Алла Тағала барлық ерлі-зайыптыларға тату-тәтті, баянды ғұмыр кешуді нәсіп етсін!

Дереккөз: muslim.kz