Жүніс Әміре: МАХАББАТ
Тән дейсің бе, тәннің жаны – Махаббат.
Жан дейсің бе, жанның жаны – Махаббат.
Тәнді қорып тұратұғын жан болса,
Жанды қорып, қорғайтұғын – Махаббат.
Дертті болсаң, емі де жоқ – Махаббат.
Кекті болсаң, кегі де жоқ – Махаббат.
Өзекті жан тани алмас болмысын
Шеті де жоқ, шегі де жоқ – Махаббат,
Біз білместі білетін де – Махаббат
Жылап тұрып күлетін де – Махаббат.
Өлтірдім деп ойласаң да, кеудеңде
Мәңгі өмір сүретін де – Махаббат.
Жақып болып жылайтын да – Махаббат.
Жүсіп болып шыдайтын да – Махаббат.
Мәжнүн болып бір көрсем деп Ләйліні
Тағдырынан сұрайтын да – Махаббат.
Мансұр болып «Хақпын» дейтін – Махаббат,
Жұпты емеспін, тақпын дейтін – Махаббат
Ғайса болып өлілерді тірілтіп,
Мен Мұсаға жақпын дейтін – Махаббат.
Деміңе дем үрлеп тұрған – Махаббат,
Барлық сырды бүркеп тұрған – Махаббат.
Бір-ақ Достың құрметіне жан беріп,
Сезімдерді сүрлеп тұрған – Махаббат.
Бәрі сенің дерегіңде, Махаббат.
Жүз мың Жүніс тереңіңде, Махаббат.
Міскін Жүніс – ешбір жанға керексіз,
Болар ма еді керегіңде, Махаббат?!
Қалыптаған Ләйлі Құндақбай
