Ábý huraıra (r.a.) nelikten ózgeshe dáret alǵan?

Ábý Huraıra (r.a.) Paıǵambarymyzdyń (s.ǵ.s.): «Úmbetimdi aqırette dáret alǵan múshelerinen tanımyn» degen hadısin estigennen bastap, dáret alǵanda qolyn ıyqqa, aıaqtaryn tizesine deıin muqııat jýatyn. Hadıste dáret músheleriniń jarqyraǵanyn sıpattaý maqsatynda «ǵýrreá mýhajálıın» «mańdaılary jarqyraǵan» degen teńeý qoldanylǵan. Ábý Huraıra hadısti «dáret músheleriniń kóbirek jarqyraýy úshin olardy molynan jýyńdar» dep tolyqtyrady da, óziniń qolyn ıyǵyna deıin, aıaǵyn tizesine deıin jýatynyn aıtady.

Sondaı-aq, Ábý Huraıra (r.a.) paıǵambarymyzdyń hadısinde aıtylǵan mán-jaıdyń tereńine ózgeshe bir qyrynan boılap, Allanyń quzyrynda abyroıly bolý maqsatynda dáretti uqyptap alatyn. Paıǵambarymyz birde: «Alla Taǵala qatelikterińdi óshirip tazartatyn jáne dárejelerińdi (abyroılaryńdy) kóteretin bir jaıtty aıtaıyn ba?» – dep suraıdy. Sahabalar jappaı: «Iá, aıtsańyz eken, ýa, Alla elshisi!» – deıdi. Paıǵambarymyz (s.ǵ.s.) sonda: «Dáret alý barynsha qıyndaǵan shaqta dáretti eshqandaı kemitpeı tolyq alý, meshit pen úı arasyndaǵy uzaq joldy júrip ótý jáne bir namazdan soń kelesi namazdy asyǵa kútý – osylar Alla Taǵalaǵa jaqyndaý bolyp tabylady»[1], – degen eken.