ADAM IBILISTEN NENI BILDI!
Abý Darda (Oǵan Alla razy bolsyn):
«Alla Taǵalaǵa eń qurmetti adam, ol kún men aıdy baqylap júretin adam», - deıdi. Sol kezde ony estip otyrǵandar:
«Eı, Abý Darda, ol azanshy ma?» - dep suraıdy. Sonda ol:
«Kún men aıdy baqylaýshy adam ol – árbir namaz ýaqytyn baqylap júretin musylman», - degen eken. Paıǵambarymyz(Oǵan Allanyń ıgiligi men sálemi bolsyn):
«Namaz – Rabbymyz Alla Taǵalany rıza qylady, namaz oqyǵan pendeni perishteler jaqsy kóredi. Namaz - paıǵambardyń joly, Allany taný, ımannyń negizi, duǵanyń amaldardyń qabyl bolýy, rızyqtyń berekesi, deneniń rahaty, dushpannyń qarýy (Alla Taǵala adamǵa senderdiń ashyq dushpandaryń – shaıtan degen, ıaǵnı namaz – sol shaıtanǵa qarsy qarý). Namazdy shaıtan jek kóredi, al namaz bolsa ólim perishtesi adam balasynyń janyn alýǵa kelgende ortasynda shapaǵat, qabirde shyraq, qabirde astyna tóseletin tósenish, eki perishte kelip, qabirde suraq qoıǵan kezde olarǵa jaýap jáne qııamet kúni joldas, qııamet kúni bolǵanda eshqandaı kóleńke joqta sol namaz-kóleńke, basyna táj, ústine kıim, shashylyp turǵan nur, ottan qorǵan jáne musylmannyń qujaty, mızan tarazysynda aýyr basatyn, sırot kópirinen ótkizýshi. Namaz - jánnattyń kilti, óıtkeni namazda tásbıh bar, maqtaý bar, qasıet bar, ulyqtyq bar, duǵa bar. Amaldardyń eń abzaly – óz ýatynda oqylǵan namaz», dep jaqsylap sýrettegen.
Namazǵa turmaǵan, Adamǵa sájde etýge tákapparlanǵan Ibilistiń hali neshik boldy?! Alla Ibiliske erip, tákapparlanǵandardy tozaqqa salady. Týra joldan adasýshylardyń barar jeri de tozaq. Al, sol máńgilik alaýdan qutqaratyn eń negizgi amal – namaz. Bizge jetken rıýaıatta bylaısha aıtylǵan:
«Ibilis (Allanyń oǵan laǵneti bolsyn) áýelgi zamandarda kózge kórinip júretin edi. Oǵan bir er adam kelip:
«Eı, Ibilis, sen osyndaı bir Alla Taǵalanyń jıirkenishti tozaǵyna laıyqta halge qalaı jettiń?», - dep suraıdy. Sonda Ibilis:
«Menen bul suraq jaıly eshkim suraǵan emes. Sen nege suradyń?», - deıdi. Sonda ol er adam:
«Men de seniń dárejeńe jetkim keledi», - deıdi. Sol kezde Ibilis:
«Egerde sen sondaı bir Allanyń eń jıirkenishti, tozaqqa laıyqty quldarynyń qataryna qosylǵyń keletin bolsa, onda sen namazǵa nemquraılylyqpen qara jáne árbir nársege ant ishe ber. Qandaı bir másele bolmasyn sen ant ishe ber», - dep aıtady. Osyny estı sala álgi er kisi:
«Alla Taǵalanyń atymen ant ishemin, endi men árqashan ýádege berik bolamyn, namazymda eshqashan nemquraılylyq tanytpaımyn», - deıdi. Osyny estigen Ibilis óziniń aldanǵanyn sezip:
«Men eshqashan mundaı adamǵa aldanyp kórgen joqpyn, endi men eshqashan adammen sóılespeımin», - degen eken. Pendeni týra joldan taıdyryp, Allanyń qaharyna ushyratýdy qalaıtyn Ibilistiń ózi adammen sóılespeıtin bolǵan, al adamdar she? Shaıtannyń aldaýyna erip, nápsiniń ertken jaǵyna yǵyp barady. Islam dini meıirimdilik pen izgiliktiń joly. Jaqsy amal etkender álbette jaqsylyqqa qaýyshady. Alla elshisi (Oǵan Allanyń ıgiligi men sálemi bolsyn):
«Qııamet kúni quldan eń birinshi suralatyn ol – namaz. Egerde onyń esep-qısabynda paryz namazdary tolyq bolsa, onyń esep-qısaby ary qaraı jeńil bolady. Al egerde paryz namazdary tolyq tolmasa, onda Alla Taǵala perishtesine: «Onyń nápil namazdary bar ma? Alyp kelińder», - deıdi. Osy nápil namazdarymen paryzdardyń orny tolyqtyrylady. Tolmasa, Alla Taǵala: «Istegen izgi amaldaryn alyp kelińder», - dep buıyrady. Eger osymen onyń paryz namazdary tolsa, ary qaraı Alla Taǵalanyń esep-qısaby ol pende úshin jeńil bolady» degen. Jáne de paǵambarymyz(Oǵan Allanyń ıgiligi men sálemi bolsyn): «Egerde qul bes ýaqyt namazyna jáne jamaǵat namazyna únemdilik tanytsa, Alla Taǵala oǵan bes qasıet beredi: tirshilikte qıyndyqty ketiredi, qabir azabyn ketiredi, aqyret kúni amal dápterin oń jaǵynan beredi, sırot kópirinen naızaǵaıdaı ótkizedi, jánnatqa eshqandaı esep-qısapsyz kirgizedi. Al eger, namazdary men jamaǵat namazyna nemquraılylyq tanytsa, Alla Taǵala ondaı qulyn on eki azappen jazalap qoıady:
onyń úsheýi tiri kezinde,
úsheýi óler aldynda,
úsheýi qabirinde,
úsheýi qııamet kúninde.
Tirshiliktegi jazasy – qaıbir isi bolmasyn Alla berekeni ketirip qoıady. Amaldary qabyl bolmaıdy, rızyq nesibesinde bereke bolmaı, júzinen jaqsylyqtyń belgisi ketip, nursyz kórinedi. Mańaıyndaǵy adamdardyń júregine sol adamǵa degen jekkórinish paıda bolady.
Óler aldyndaǵy azaby – pende jan tapsyrar aldynda qarny ashqan, qatty shóldegen kúıde bolyp, jany táninen óte aýyr jaǵdaıda shyǵady.
Qabirdegi azaby – qabirde eki perishte qoıar suraq aýyr bolady, qabiri tarylǵan kezde pendeniń qabyrǵalary qaıysyp, qarańǵy túnek bolady.
Qııamettegi azaby – esep-qısaby aýyr bolady, ol pendege Alla Taǵalanyń ashýy ornap, ony Tozaq otymen jazalaıdy», - degen.
Saǵıd án Qotada Dánıaldyń (Oǵan Alla razy bolsyn) Muhammed paıǵambardyń(Oǵan Allanyń ıgiligi men sálemi bolsyn)úmmetin bylaısha sıpattaǵanyn jetkizgen:
«Paıǵambarymyzdyń (Oǵan Allanyń ıgiligi men sálemi bolsyn) úmmeti namaz oqıdy. Egerde Nuhtyń (Oǵan Allanyń sálemi bolsyn) úmmeti de namaz oqyǵanda, olar sýǵa batpaıtyn edi. Egerde osy namazdy Ǵad qaýymy oqyǵan kezde, olarǵa bir jel kelip olar qurdymǵa ushyramaıtyn edi. Egerde Samýd qaýymyna bul namaz kelip, olar namaz oqyǵan bolsa edi, olardy bir jańǵyryq qurdymǵa ushyratpaǵan bolar edi, - dep aıtty da, keıin Qotada, - Namazdaryńa saq bolyńdar, óıtkeni namaz musylmandar úshin jaqsy amal bop berilgen. Namaz - kóp jamandyqtan saqtaıdy», - dep eskertti.
Mine sondyqtan da barsha musylmandy yqylaspen namaz oqýǵa úndeımiz. Alla Taǵalanyń súıikti quly bolýdy armandap, sol jolda izgi amaldar jasaý qajet. Óz úmmeti týrasynda Muhammed paıǵambarymyz (Oǵan Allanyń ıgiligi men sálemi bolsyn): «Meniń úmmetimdi Alla Taǵala raqmetine aldy. Rasynda Alla Taǵala ózderin álsiz sanap, yqylaspen duǵa jasap, namaz oqyǵany úshin olardan pálelerdi ketiredi», - dedi. Osy aıtylǵa sózge laıyqty bolaıyq, qurmetti musylman baýyrlar!
AITQAZIN Raýan Tóleýbekuly
