ADAMDARDYŃ DINGE MUQTAJDYǴY

Din árbir adamnyń mindetti túrde qajet etetin muqtajdyqtarynyń biri. Óıtkeni, qudaıǵa senbeımin degen dinsiz, ateıst adamnyń ózi, eshbir qutylýǵa múmkindik qalmaǵan kezde, jan alqymyna taqalǵan kezde birden Alla Taǵalam dep bastaıdy. Ózderine bir kómek bere alatyn bir Uly Qudiretti jan ushyryp izdeıdi. Adamnyń táni bolýmen qatar, onyń rýhy da bar. Iship-jeý tánniń muqtajdyǵy desek te, onsyz adam balasy tirshilik keshe almaıdy. Densaýlyǵyna orasan zııan keledi. Dál sol sekildi adam rýhynyń qajettiligi bar. Al rýhtyń muqtajdyqtary ótelmegen jaǵdaıda adam aýrýǵa dýshar bolady. Tán aýrýy kóbinese adamnyń ózine zııan keltiretin bolsa, rýhanı aýrý qorshaǵan aınaladaǵy adamdardyń barlyǵyna zııandy. Mysaly, bir kisi ótirikshi, ósekshi, arandatýshy sekildi ádetterge dýshar bolsa, bul minezden tek ózine ǵana emes, qoǵamǵa da úlken zardap keletini daýsyz.

Din adamdardyń óz júregin tynyshtaldyratyn nemese qorqynyshyn seıiltetin rýhanı qaınar dep aıtýǵa bolady. Bul dúnıede óziniń izdegenin taba almaǵandar, aqysy jelingender, kóz jasy tógilgender, ómir boıy aýrýǵa dýshar bolǵandar, aqyrette izdegenderimen qaýyshatynyna senip, kóńilderin jubatyp, júrekteri tynyshtyq tabady. Endeshe, dinniń bir tarmaǵy bolǵan aqyretke ıman, adamdardyń júregine bir qýanysh syılaıdy. Sondaı-aq, dinge sený, moıynsyný adamdardy jaqsylyqqa qaraı bastaıdy. Adamdar dinge sengennen ǵana kez kelgen jaqsylyqty eshbir aqysyz, tegin jasaýǵa daıyn bolady.