ÁKE DEGEN KIM?

Professor ózi lektsııa oqyp jatqan magıstranttarǵa «Áke degen kim?» degen suraqty ortaǵa tastady. Berilgen jaýaptan árkimniń óz ákesine degen qarym-qatynasy belgili bolatyn. Aralarynda óte jaqsy jáne óte qarapaıym jaýap bergenderi de bar edi. Sonyń ishinde professorǵa qatty áser etkeni ári esinde qalyp qoıǵany tómendegi jaýap bolatyn.

Áke - sen onyń aıaq kıimin kıesiń, biraq onyń aıaq kıimi úlken, al seniń aıaǵyń kishi bolǵandyqtan epteı almaı qulap túsesiń.

Sen onyń kózildirigin kıesiń, biraq kózildiriktiń ózińe úlkendigin sezesiń.

Sen odan kóliginiń kiltin suraısyń. Ózińdi ákeń ornynda sezinip, mashınany basqarmaqshy bolasyń.

Oıyńa bir suraq kelip, ákeńe qońyraý shalasyń, ákeń sharýasynan qoly bosamasa da, senimen áńgimelesedi.

Jumystan úıge kelgende seni baýyryna basyp, meıirlene qushaqtap, mańdaıyńnan ıiskep súıedi. Biraq sen ony bile bermeısiń. Sol kúni ákeń túrli eskertý alǵan bolýy múmkin, serigi kóńilin qaldyrǵan bolýy múmkin, senderdiń nápaqalaryńdy taýyp kelý qıynǵa soqqan bolýy múmkin.

Ol jumystan kelisimen «áke maǵan aqsha bershi tátti alaıyn» deısiń. Ol: «Botaqanym, erteń jumystan qaıtarda ózim alyp kep beremin», - dep jaýap beredi. Erteńine tynymsyz jumys jasap, ystyqqa kúıip, kóptegen adamdarmen kezigip, ábden sharshap júrip, seniń suraǵan nárseńdi umytyp ketedi. Al sen: «Ákeshim tátti alyp keldińiz be?» - dep suraısyń. Sonda ol sharshaǵanyn da umytyp, saǵan tátti alyp kelý úshin aıaq kıimin qaıta kıip kóshege shyǵyp ketedi. Jaraıdy osy jerden toqtalaıyq...

Endi búgin sen óstiń, boı túzep er jettiń. Burynǵynyń bárin umyttyń.

Sóıtip asqar taýdaı ákeńniń aıaq kıimin eskirgen dep kımeısiń.

Onyń kıimderin, pikirlerin, kóligin eskirdi, modadan qaldy dep mensinbeısiń. Sebebi sen dostaryńa jaqsy kólik minip maqtanǵyń keledi, biraq onyń kóligi maqtanýǵa kelmeıdi.

Onyń áńgimeleri de saǵan unamaıdy.

Onyń qaltyraǵan qoly men jasaǵan áreketterinen uıalasyń.

Úıińe jora-joldastaryń qonaqqa kelse, aralarynda ákeńniń otyrǵandyǵy seni qınap, kózderi ákeme túspese eken dep qynjylyp otyrasyń.

Jumystan keshikseń ýaıymdap, saǵan qońyraý shalady. Ákeńniń qońyraýy jumysyńa kedergi keltirip, seni mazalap jatqandaı kórinedi. Qaı-qaıta qońyraý shalsa, keıde jaýap ta bermeı qoıasyń.

Úıge kesh kelgenińde ómirge jaýapkershilikti bolýyń úshin uryssa (bilip qoı, ol saǵan áli de tárbıe berýdi jalǵastyryp jatyr, óz jaýapkershiligin sezinip jatyr, ol saǵan jaýapty adam. Al árbir jaýapty adam óz qol astyndaǵylaryna jaýapkershilikpen qaraıdy), sen oǵan daýys kóteresiń, aýyr sózderińmen júregin jaralaısyń....

Əkelerdi qadirleı bileıik...