Akýsherdiń musylman bolýyna sebep bolǵan oqıǵa
Kúnderdiń kúninde AQSh-tyń bir shtatynda Ýrıfa degen akýsher-dáriger (áıel kisi) bolypty. Birde onyń aldyna tolǵaǵy kelip turǵan musylman kelinshek keledi. Ony ary-beri qarap, bosanatyn ýaqyty kelgenin málimdeıdi. Biraq, qansha tolǵaq kelgenimen ol kúni bosanbaıdy.
Ertesine Ýrıfa musylman áıelge: «Meniń qyzmet ýaqytym aıaqtaldy. Qazir basqa dáriger er kisi keledi. Sol sizdi bosandyryp alady», – deıdi. Muny estigen musylman: «Joq, men er azamattyń aldynda bosana almaımyn. Múmkin bolsa basqa áıeldi aldyrtsańyz. Bizdiń dinimizde mundaıǵa jol joq», – deıdi tabandylyq tanytyp. Muny estigen Ýrıfa tańdanyp, kelisip, ornyna áıel dárigerdi daıyndap ketedi.
Sodan bir kún ótip, Ýrıfa qaıta jumysqa túsedi. Kele sala eń aldymen álgi musylman áıeldiń jaǵdaıyn suraýǵa barady. Sóıtse, ol bosanyp qoıǵan, demalyp jatady. Ýrıfa jaqyndap, jaǵdaıyn suraıdy. Musylman Qudaıǵa shúkirshiligin aıtyp, rızashylyǵyn jasyrmaıdy. Mundaı dindarlyǵyna tańdanǵan Ýrıfa: «Siz dindi qatty ustanatyn sekildisiz, janyńyzǵa bóten erkek jaqyndatpaısyz, eki sózdiń birinde Qudaıǵa shúkirshilik aıtasyz, ıslamda bosanǵannan keıin endi ne isteý kerek?» – dep qyzyǵa suraq qoıady. «Dinimizde bosanǵan áıelde kem degende 40 kún boıy qan aınalymy (nıfas) júredi. Sol ýaqytta kúıeýmen jaqyndasýǵa bolmaıdy. Buǵan qosa, sol aralyqta jaqsy tamaqtanyp, densaýlyqqa kútimmen qaraý kerek» deı bergende Ýrıfa: «Iá, bilemin. Qazirgi ýaqytta bizdiń elde kóptegen áıelder osyndaı ýaqytta kútinbesten, jaqyndasyp qoıyp, artynsha túrli aýrýlarǵa shaldyǵyp jatatyny bar. Bul ǵylymda dáleldengen», – deıdi. Sonda musylman áıel: «Bul másele 14 ǵasyr buryn Quranda aıtylyp ketken. Al, ǵylym buny endi bilip jatyr», – deıdi. Ýrıfa tańdanysyn jasyra almaı: «Bul qalaı sonda?» – deıdi. «Rasymen de, áıel adam ondaı ýaqytta qulshylyq jasaı almaıdy, oraza ustaı almaıdy, tazarǵansha birshama úziliste bolady», – deıdi musylman kelinshek.
Sol ýaqytta Ýrıfa balany kóreıin dep jaqyndasa, anasy ony oń qyrymen jatqyzyp qoıǵanyn kóredi. Sonda Ýrıfa: «Rasynda, balany bulaı jatqyzý arqyly júrek soǵysy jeńildeıdi jáne jaqsy tynys alady. Muny qaıdan bildińiz?» – dep tań qalady. Musylman áıel kúlimsirep: «Bul – bizdiń ardaqty Muhammed (s.ǵ.s.) paıǵambarymyzdyń úıretken joly», –dep qysqa qaıyrady.
Osyndaı aqparattardyń ózi Ýrıfany ıslamdy tanyp-bilýge qushtar etedi. Sodan ol bir aıdan soń jumystan eńbek demalysyn alyp, ıslamdy oqýǵa kirisedi. Ol jerde kóptegen medıtsınalyq derekterdi oqyp, ıslamnyń aqıqat din ekenine kózi jetedi. Sodan Ýrıfa ıslamdy qabyldap, búginde dindegi ǵylymmen baılanysty aqıqattardy jazýmen aınalysyp keledi eken.
Jalǵas ASHATULY
dintanýshy
