Alla Elshisine (s.ǵ.s.) syılyq
Ýa, Alla Elshisi Búgingi kún men úshin basqa kúnderden ózgeshe. Kóńil kúıim qulazyp, sen degende júregimnen mazdap janǵan saǵynysh otynyń áserinen jalyn bop shyqqan ystyq demim syrtqy sýyq aýamen aralasýda. Bul saǵynyshymnyń seniń meırimińniń aldynda túkke turǵysyz ekendigi maǵan aıdan anyq. Degenmen, laıyqty bolmasam da, saǵan degen saǵynysh teńizine júze almasam da, seni ańsaǵan kóptegen úmmetińniń atynan bul hatty saǵan joldaımyn Allanyń ardaqty Elshisi!
Men sizdiń qansha ǵasyr buryn sahabalaryńyzǵa aıtqan, sol bir zamanda ómir súrip jatqan úmmetińizdiń birimin. Men namazdyń qadirin bilmegen, namazymdy ýaqyttyń sońynda oqyǵan, keı ýaqyttary qazaǵa jibergen, seniń súnnetińdi tolyq oryndamaǵan, erteli-kesh saǵan sálem joldamaǵan, kerisinshe sen tyıym salǵan isterge jaqyn júrgen janmyn. Ótken ómirime qarasam, sizden súıinshi suraıtyn isterim men sizge qýanyshpen jetkizetin sátterim joqtyń qasy.
Sizdiń esimińizdi estigende júregimdi saǵynyshtan syzdata almadym. Janaryma jas kelmedi. Biraq, men tyrystym. Sizdiń ardaqty esimińizdi estigende, kózimnen sizge degen saǵynyshymnyń kýási retinde aqmonshaq jastar domalaýyn ańsaımyn.
Ýa, Alla Elshisi, Sizdi túsimde kórýdi qatty armandaımyn. Sizdi kórgender maǵan nurly júzińizdi, meıirimge toly kózińizdi jetkizdi. Oılasam, olar sózimen, isimen sizge shynaıy úmmet bolýǵa laıyqty jandar eken. Men ózimniń kináli jan ekendigimdi bilem.
Ýa, Alla Elshisi! Biraq kúná batpaǵyna batqan úmmetińe ashqan meıirimdi qushaǵyńnyń jylýyn sezingendeımin. Múmkin, sol jylý bolar meni ornymnan turǵyzyp, úmitke jetelegen... Keı sátteri «bir kúni tańǵy uıqydan oıanǵanda, sizdi túsimde kórgenimdi esime túsirip, kózimnen qýanysh jasynyń aǵýyn» ańsap, qııal teńizine batam.
Sizdiń ósıetińiz boıynsha júrip, kózimdi,qolymdy,tilimdi kúnádan tyıǵanda, munshalyqty ókinishke qalmas pa edim.
Biraq, men olaı jasaı almadym. Jaratýshyǵa táýbemdi yqylassyz túrde jasadym. Ǵıbadattarym men jaqsylyqtaryma jalǵandyq aralasty.
Jyldar boıy kóp ýaqytym qarańǵylyqta ótti. Qadir túninde Jaratýshyǵa jalbaryna almadym. Oraza aıynda baltyrym syzdaǵansha namaz oqı almadym. Qanshama tańym namazben emes, uıqymen atyp, kúnim zikirmen emes, orynsyz kúlkimen batty.
Ýa, Alla Elshisi! Siz bilesiz be? Men namazdarymnyń artynan Alla Taǵaladan istegen kúnálarymdy sizge bildirmeýdi surap jalbarynamyn. Sebebi sizdiń, jasaǵan kemshilikterimdi kórip, menen alystap ketýińizden qorqam. Siz bizdiń baǵdarymyzsyz. Qaıda barsam da, qaı jerde tursam da sizdiń jol kórsetýińizge muqtajbyz. Sizdi jaqsy kórgender ómirin baqyttyń ishinde ótkizedi. Men de sol baqytqa jetýdi armandaımyn .
Búgin sizdiń týylǵan kúnińiz, sizge syılaıtyndaı súnnetińe bekem jandardiki sııaqty, sizdi qýantatyn mol syılyq mende joq. Dese de, men búgin sizge arnap dúkennen salaýat atty bir gúl satyp aldym. Eń tartymdysynan, eń ádemisinen, jupar ısi ańqyǵan, qyp-qyzyl. Eger siz osy zamanda aramyzda ómir súrseńiz, bilem, dál búgin esigińizdiń aldy ásem gúlderge tolyp keter edi.
Bálkim, satyp alǵan gúlimdi sizge óz qolymmen bere almaǵan da bolar edim. Sebebi súnnetińe bekem bolmaı, sizben kezdesýden uıalam.
Biraq sizge degen qurmetimdi bildirip, uıqysyz atqan máýlit tańymen birge alǵan gúlimdi esigińizdiń aldyna qoıǵannan keıin qaltarystan sizdiń úıden shyǵyp, gúlimdi alýyńyzdy kútýshi edim . Esigińizdi ashyp gúlimdi alǵan sátińizde, gúldiń syrtyndaǵy qaǵazǵa jazylǵan meniń atymdy «úmmetim» degen dápterińizdiń ishine jazǵaısyz!
Sol kezde alystan sizdiń nurly júzińizdi kórip, qýanyshtan meniń janarymnan jas monshaqtary domalar ma edi, shirkin! Osylaısha, týylǵan kúnińizge syılyǵymdy berýdi armandaımyn. Sizdi qatty saǵyndyq, ýa, Alla Elshisi!
Iýsýf Shuǵaıuly
