ALLANYŃ ULYLYǴYNA LAIYQTY QULShYLYQ JASA, NEMESE...
Bir ǵulama bylaı dep mysalǵa alady: «Tyshqan túıege ǵashyq bolypty. Sodan túıege arnap hat jazyp, óleń arnap, qyzyl tilimen túıeniń júregine jol tabady. Ony oqyǵan túıe de, tyshqanǵa kóńil qoıady. Sodan tyshqan túıeni úıine alyp keledi. Barshamyzǵa málim tyshqannyń úıi qandaı ekeni. Qansha áreket etse de, túıeni úıine syıdyra almaıdy. Sonda túıe tyshqanǵa:
- Sen mahabbatyńa laıyqty úı sal nemese úıińe saı mahabbat tap-deıdi.
Ǵulamanyń aıtpaǵy - Allanyń ulylyǵyna laıyqty qulshylyq jasa nemese qulshylyq etetin basqa nárse tap degisi kelgen ekendigi emeýringe oıysady.
«Áýeli keledi ǵoı pamdat namaz,
Oqıdy sol namazdy qandaı sabaz.
Eger de sol namazdy támam etseń,
Bir Alla ár páleden qylar qalas.
Ekinshi, kele jatyr uly besin,
Ómirdiń kim biledi erte-keshin.
Muny da mezgilinde támam etseń,
Bir Alla beredi ǵoı nesibesin.
Úshinshi, kele jatyr namazdyger,
Oqyp qal, shamań jetse, bolsa jiger.
Eger de mezgilinde oqymasań,
Maǵsharǵa barǵanyńda bir tergeler.
Tórtinshi, kele jatyr taǵy aqsham,
Jigitter jaqsy bolar dindi baqsań.
Muny da mezgilinde oqymasań,
Qaıter eń tamuqtyń sen otyn jaqsań.
Besinshi, kele jatyr jashıyq namaz,
Ol ózi bilgenderge ǵashyq namaz.
Bes namaz orazany tamam etip,
Jumaqqa barǵanyńda maqtan, Sabaz!» – dep Baıserke abyz jyrlaǵan.
«Qınalǵan kezde Qudaıdyń saǵan járdem bergenin qalasań, jaǵdaıyń jaqsy kezde Qudaıyńdy kóp eske al» degen danalyq bulaǵynan da kókeıge toqyrymyz kóp. Allany eske alýdyń úlkeni – namaz. Namazda dene músheleri de, til de, júrek te Allany eske alyp, boıusynady. Tipti, Quranda namaz oqýymyzdyń maqsaty anyq baıandalǵan: «...Meni eske alý úshin namaz oqy!» ( «Ta ha» súresi, 14-aıat ) Eń keremeti – bul kezde Alla seni eske alady. Ol týraly qasıetti Quranda: «Meni eske alyńdar, Men de senderdi eske alamyn» («Baqara» súresi, 152-aıat ) delingen.
Asa uly Allanyń Óz quldaryn eske alýy, quldarynyń Ony eske alýynan úlken. Al árdaıym Rabbysynyń esinde bolǵan qulda qandaı ýaıym bolsyn!?
Amantaı TOIShYBAIULY
