ALYSTA - NE ALYS!

Baıdaly qartaıyp úıden shyqpaı kúndiz-túni tósekte jatatyn boldy degendi estip Musa myrza izdep kelipti. Baıdaly sheshen qarasha úıiniń ishinde bóstekke oranyp jatyr eken. Musanyń qolyn alyp, jónin surap amandasypty da, káriliktiń jaıyn aıta beripti.

—    Oı, kárilik-aı, sózdiń ózi bala, terbetse oıanady, terbetpese oıanbaıdy, zamanym ótti ǵoı!—deı beripti.

Musa qonyp, qonaqasyn jep, tańerteń júrmek bolady.

—    E, shyraǵym, elińe ne aıtyp barasyń? — depti Baıdaly.

—   Men ne aıtaıyn, el aǵasy bolǵan Baıdaly edi, endi kárilik pen alysyp jatyr eken deımin daǵy,— depti Musa.

—    Shyraǵym, onyń ras. Úsh aýyz sóz suraıyn, sony sheship berip ketshi!—deıdi qart. Musa «aıtyńyz» dep tyńdaıdy. Baıdaly qart sonda:

—    Alysta ne alys?

Jaqynda ne jaqyn?

Tátti de ne tátti? — deıdi.

Musa oılanyp otyryp:

—    Jer men kóktiń arasy alys,

Kisige týys jaqyn,

Bala tátti, depti.

Sonda Baıdaly qart basyn kóterip:

—    Balam, aqylyń áli alqymyńnan asqan joq eken. Bilimdi men bilimsizdiń arasynan alys joq, jannan tátti joq. Bala qansha jaqsy bolsa da, jan shyǵarda adamnyń óz janynan tátti joq. Jaqynda — ajal jaqyn,— depti.