ARSYZ ADAM – TEK NƏPSISINIŃ QULY

Sotta bir áıel men er kisiniń daýy qaralady. Qazy ornyna jaıǵasam degenshe, aıtys-tartys bastalyp ta ketedi.

Alǵashqy sózdi alǵan áıel erkekti nusqap:

– Bul kisi meni zorlap, arymdy aıaqqa taptady, – dep jylaı bastaıdy.

– Ótirik aıtyp otyr, qazy myrza. Men satqan qoılarymnyń aqshasyn sanap jatqanymda, osy áıel keldi de, jaǵdaıynyń qıyn ekenin aıtyp, aqsha surady. Men bere qoımaǵannan soń, ózinen-ózi aıqaı shyǵardy, – deıdi er kisi.

Qazy olardyń sózi men áreketterine qarap, ishteı barlyǵyn túsindi. Biraq munysyn eshkimge sezdirmeı er kisige:

– Qane, qaltańdaǵy aqshany dereý oǵan ber. Nemese seni qamap tastaımyn, – dep ashýǵa basty.

Qazynyń bul áreketine barlyǵy tańyrqaı qarasty. Aqshany qýana-qýana alǵan áıel shyǵyp ketti. Sol kezde qazy er kisige áıeldiń artynan baryp, aqshany qaıtadan alyp kelýin buıyrdy. Túsinbeı qalǵan baıǵus syrtqa júgire jóneldi. Kóp uzamaı ekeýi qaıta oraldy.

Erkektiń beti tyrnalǵany sonshalyq – qany sorǵalap aǵyp turdy. Alǵashqy sóz taǵy da áıelge berildi. Ol ashýly keıipte:

– Qazy myrza! Myna ońbaǵan bul joly sizdiń maǵan bergen aqshańyzdy tartyp alýǵa tyrysty, – degeninde, qazy:

– Jaraıdy. Aqshany ala aldy ma? – dep surady. Áıel yrjıyp:

– Men myna ilmıgen bálege aqshamdy berip, qarap turamyn ba? – degende, qazy qatýlanyp:

– Eı, uıatsyz! Jazyqsyz janǵa jala jaýyp, zorlady dep daýlasasyń. Aqshany qaıtarmaý úshin baryńdy salǵansha, odan da aryńdy taptatpaý úshin jantalaspadyń ba? Dereý qaıtar aqshasyn ózine! – dep arsyzdyqtyń jolyn kesipti.

P. S. Baıbalam salǵannyń bári birdeı shyndyq bola bermeıdi. Arsyz úshin ar saýdalaý, ózgeniń taǵdyrymen oınaý túk te uıat emes)))