Ata-anaǵa «úh» deý – eń aýyr sóz
Joǵarydaǵy aıatty qaıta qarastyratyn bolsaq: «Al eger olardyń biri nemese ekeýi de qoldaryńda turǵan kezde qartaısa, olarǵa «úh» dep te aıtpa. Sondaı-aq, olarǵa zekime jáne olarǵa sypaıy sóıle...»[1], – delingen.
Eń áýeli aıatta balanyń ata-anasymen qandaı qarym-qatynasta bolyp, olarǵa qalaı sóıleý kerektigi kórsetilgen. Perzenttiń ata-anasyna qarsy kelýi, jekýi, ursýy, qol kóterýi, júrekterine kirbiń túsirýi, olardy jalǵyz tastaýy bylaı tursyn, «úh» deýine de bolmaıdy. Quran ata-anaǵa qurmetsizdiktiń eń óreskel túrin «úh» degen sózben beıneleıdi. Olardyń aldynda «úh» degen sózdi aıtýdyń ózine tyıym salsa, olarǵa qarsy sóz aıtyp, jekýdiń qanshalyqty jıirkenishti ekenin óińińiz-aq paıymdaı berińiz.
Ata-anaǵa degen qurmet qoǵamnyń da uıytqysy bolǵandyqtan Jaratýshy Jappar Iemiz Quranda buǵan erekshe toqtalǵan. Sondyqtan musylman pende bul máselege ústirt qaraı almaıdy. Alaıda, dál osy máselede tek qana dinı jáne ulttyq tárbıeden shettep qalǵandar ǵana emes, keıde ózin musylmanmyn dep, Islamnyń búkil qundylyqtaryn jan-júregimmen qabyldadym degenderdiń ózi de qatelikke urynyp jatatyny ashy shyndyq. Iman keltirgen jan Jaratqan Ieniń razylyǵyna jeteleıtin is-áreketterdi atqarýymen qatar, Onyń razylyq tanytpaǵan amaldaryn da jasap, jaqsylyq ataýlydan jurdaı bolmaýdy da eskergeni jón.
Keıbir jastar ata-anaǵa aqsha jaǵynan qarasýdy perzenttik boryshyn ótegendik dep biledi. Al ata-ananyń perzentinen kútetini tek qana materıaldyq kómek pe? Ózińniń kúıbeń tirshiligińniń arasynda ata-anańa ýaqyt bólip, janyna jıi baryp, hal-jaǵdaıyn bilip, qasynda otyryp áńgimelesseń, bala-shaǵańdy ertip baryp, bastarynan ıisketip, kóńilin kónshitseń, kelininiń demdegen qoıý shaıyn usynyp, mereılendirseń, ata-anań Allaǵa shúkirshiligin aıtpaı ma? Onyń qazirgi bar armany osy emes pe? Osy qyzyqty odan kem kórip, at-izin salmaı ketetin, sarǵaıtyp, jolyn tostyratyn jastarǵa ne deýge bolady? Álpeshtep ósirgen balasy qaıyrymsyz bop, tirideı sýynyp ketken perzentin bir kórýge zar bolǵan áke-shesheni ne dep jubatýǵa bolady? «Balanyń jaqsysy – qyzyq, jamany – kúıik» – degen sóz osyndaıda aıtylsa kerek.
[1] «Isra» súresi, 23-aıat
