Áıel danalyǵy

Kúıeýi ashý ústinde áıeliniń jaǵynan tartyp jiberipti. Áıeli: «Men saǵan shaǵymdanamyn» - deıdi. Sonda áli de bolsa ashýy tarqamaǵan kúıeýi: «Úıden shyǵa alsań...» - deıdi.

- Sonda meni esik pen terezeni jaýyp úıde ustamaqshysyń ba? Joq, ol men úshin kedergi bola almaıdy.
- Sonda ne istemek oıyń bar?!

Sonda áıeli: «Onyń jolyn tabamyn», - dep jýynatyn bólmege bet alady.

Kúıeýi: «E-e-e, mynaý terezeden qashamyn dese kerek», – dep, úıdiń syrtyna shyǵyp, jýynatyn bólmeniń janynda kútip turady. Biraq qansha kútse de terezeden eshkim kórinbeıdi. Sodan soń «Buǵan ne boldy?»  degen oımen úıge kiredi.

Úıine kirse áıeli dáret alyp jýynatyn bólmeden shyqqan beti eken. Júzi men qolynan dárettiń izi kórinip tur. Sol sátte ol: «Endi ne ister eken?» - degen kúıeýiniń betine kúlimdep qarap: «Men qazir Alla Taǵalaǵa shaǵymdanamyn. Ol úshin eshbir esik kedergi bola almaıdy» - deıdi de jaınamazdy alyp namazǵa jyǵylady.

Muny kórgen kúıeýi úndemesten turǵan jerinde melshıip turyp qalady.

Áıeli namazyn uzaq oqıdy. Ásirese, namazdyń sájdesinde uzaq turady.

Áıel namaz oqyp bolǵan soń istiń mánin túsingen kúıeýi: «Sájdede erekshe kóp duǵa ettiń ǵoı deımin, a?» - dedi. Áıeli betine qarap turyp baısaldyqpen: «Sen qalaı oılaısyń?» - dedi.

Istegenine ókine bastaǵan kúıeýi: «Negizi saǵan qol kóterý oıymda joq edi. Ashý ústinde baıqamastan saǵan qol kóterip qoıdym» - dedi. Sonda áıeli: «Ony men de túsindim. Sol sebepti sájdede saǵan emes, bálkim aramyzǵa túsken laǵneti shaıtanǵa shaǵymdandym. Aqirettik joldasym, balalarymnyń ákesine jamandyq tilesem, meniń kim bolǵanym?» - deıdi. Muny estigen kúıeýi kózine jas alyp, áıeliniń eki qolyn súıedi de: «Qudaı aqy! Osydan soń saǵan eshbir jamandyq istemeımin» - dep ant ishedi.