Aısha anamyzdyń (r.a) qanaǵatshyldyǵy

Hazireti Aısha (r.a.) óte qanaǵatshyl edi. Dáýletti januıada týylsa da Paıǵambarymyzdyń (s.ǵ.s.) shańyraǵyna kelgen soń, jupyny ǵana turmysqa ol tez boı úıretti. Din jolynda barlyq aýyrtpalyqtardy kóterýge óz erkimen kónip, bul ótkinshi dúnıeniń qyzyǵynan góri baqılyq ómirdiń baqytyn artyq sanady.

Birde Qusaı ıbn Úbeıd atty bir bala Aısha anamyzdy zııarat etedi. Bala kelgende, haziret Aıshanyń eski kıimdi muqııat túrde bútindep tigip otyrǵanyn kórip tańǵaldy. Aısha anamyz balaǵa: «Sen kishkene tosa tur, men myna isimdi bitireıin», - dedi. Bala ol kisige qatty tańǵalyp turǵanyn aıtty. Aısha anamyz: «Nege?»- dep suraǵanda, bala: «Mynadaı eski kıimdi alyp tigip otyrǵanyńyzdy kórgender sizdi sarań eken dep qalady ǵoı», - dedi kóńilindegisin jasyrmaı. Sonda haziret Aısha anamyz oǵan: «Balam, aqyldy bolǵaısyń, eskisin kımegenge jańa kıim joq», - dep maǵynaly jaýap qaıtarǵan eken.

Paıǵambarymyz (s.ǵ.s.) ómirden ozǵannan keıingi jyldarda áıelderi joqshylyqty kóp kórdi. Biraq alǵashqy halıfa haziret Ábý Bákir (r.a.) olarǵa arnaıy járdemaqy taǵaıyndamady. Haziret Omar halıfa bolǵanda, ol áýeli Paıǵambarymyzdyń áıelderiniń jaǵdaıyn durystaýǵa kóńil bólgisi keldi.

Osy sebepti áıelderiniń barlyǵyna birdeı memleket qazynasynan járdemaqy taǵaıyndady. Haziret Omar (r.a.) Aıshanyń basqalarǵa qaraǵanda artyqshylyǵyn eskerip, oǵan kóbirek járdemaqy taǵaıyndaǵan bolatyn. Alaıda Múmınderdiń anasy ózine járdemaqynyń kóbirek bólingenine kelispedi.