ÁJE MAHABBATY

Men sizderge shynymen bolǵan bir oqıǵany aıtyp bereıin. Bul áńgimeniń keıipkeri qazir ortamyzda júrgendikten onyń atyn ózgertip ózimizdiń biletin «Meniń atym Qojanyń» Qoja esimimen ataı salaıyq.

Bizdiń bul Qoja ómirde kezdesetin ártúrli jaǵdaılarǵa baılanysty bala kezinde ájesi ekeýi ǵana bir úıde turǵan eken. Qoja ájesin óte jaqsy kórgen, al Ájesi de Qoja úshin janyn berýge ázir. Biraq Qojanyń qolynyń suǵanaqtyǵy bar edi. Ol múmkindik shyqsa boldy, birge oınaıtyn balalardyń, nemese kórshilerdiń zatyna sýyq qolyn suǵyp, úıge qaı-qaıdaǵy birdemelerdi tasyp júripti. Ájesi Qojanyń bul qylyǵyn qoıdyrý úshin talaı márte uryssa da, aqylyn aıtsa da Qoja urlyq jasaýyn qoımapty. Ájesi bir kúni: «Qoja sen urlyq jasaǵan saıyn urystym, urdym, aqylymdy aıttym. Biraq aıtqanymnyń bári bir qulaǵyńnan kirip, kelesi qulaǵyńnan shyǵyp ketedi. Eger osydan bylaı úıge ruqsatsyz basqa adamdardyń birdemelerin ákeler bolsań men myna toqyma bizin otqa qyzdyryp qolyńdy qarıtyn bolamyn» dep eskertipti.Osy sózden keıin Qoja birshama ýaqyt urlyq jasamaı júripti. Óıtkeni Ájesiniń aıtqan sózi umytylma qoımaǵan edi. Biraq ol áńgimeni umytqan Qoja bir kúni taǵy da urlyq jasaıdy. Onyń qaltalaryn toltyryp ákelgen urlyq zattaryn Ájesi alǵashynda kórmegen syńaı tanytsa da, birazdan keıin shydamaı «Qoja beri kel,qaltańdaǵy zattardy shyǵar!» dedi. Onyń qaltasynan pyshaq, qaryndash, óshirgish, kishkentaı dop, tıyn-tebender t.b. ózine eshbir qajeti joq usaq-túıek zattar shyǵypty.

Ájesi «Bul zattardy qaıdan aldyń?» dep suraǵanda ol úndemedi. Ájesi: «Sen taǵy da urlyq istegen ekensiń ǵoı.Maǵan bergen sózińdi umyttyń ba?» dep toqyma bizin alyp kelip otqa qyzdyra bastapty. Biz otqa ábden qyzarǵan kezde Ájesi Qojany janyna shaqyryp «Qáne, qolyńdy shyǵar» depti. Qoja da óziniki qate ekendigin bilgendikten qaıterin bilmeı sasqalaqtapty. Biraq Ájesi kenetten: «Men seniń ury bolýyńdy tilemeımin. Seni jazalaýǵa tıispin. Biraq men seni óte jaqsy kóretindikten seni jazalamaı ózimdi jazalaǵandy jón kórdim» dep Qojanyń qolyn emes óz qolyn ystyq temirmen kúıgize bastapty. Shoshyp ketken Qoja baqyryp jylap jiberse kerek. Al Ájesiniń qoly ystyq temirge qarylyp, terisi qoldyrap túsip, bileginiń eti kúıip qalǵan eken. Ájesi: «Qoja balam, kórdiń be, osyny umytpa. Seniń urlyq jasaǵanyń maǵan qanshalyqty aýyr tıetinin bil. Eger urlyq isteı berseń men sen úshin elden uıalǵandyqtan osylaı ózimdi otqa qaryp, órtenip ólemin. Bul seniń urlyq jasaǵanyń úshingi meniń tóleıtin tólemim bolady» depti.

Osydan keıin Qoja urlyq isteýdi múlde qoıypty jáne Ájesi esine túsken saıyn osy kúnge deıin ókinishten ózegi órtenedi eken.

A.TOIShYBAIULY