BARAQ TÓREGE

Birde Dýlat (Babataıuly) Baraq tórege kelse, Baraq keketip:

-- Jarasqul-sham, sóıle,– depti.

Sondaǵy Dýkeńniń aıtqany:

 

-- O, Baraq jas, Baraq jas!

Jegenge toq, ishseń mas.

Jaqsy bolsa ulyǵy,

Óz elin jaýdaı talamas.

Qasqyr tartyp, qan shyqsa,

Jaman ıt julyp jeı berer,

Aldy-artyna qaramas.

Jaqsy ıttiń belgisi –

Julmaq túgil jalamas.

Azǵan eldiń bekteri

Qan shyqsa, elin julmalar

Qasqyrmenen aralas.

Qazirgi qazaq ulyǵy

Jaman ıtten nesi kem –

Jemtik kórse, qan kórse,

Aırylar múlde esinen.

Sender atqa mingen soń,

Tandyr bolyp sýaldy

Shalqar kóldeı nesibem.

Ábilpeıiz arǵy atań

Altyn tuǵyr suńqar-dy.

Eriktirip batyryn,

Qýnatyp edi tulpardy.

Tusyńda seniń, han Baraq,

Azýly beıne ań Baraq,

Sodyrly, soıqan tóleńgit

Elge qaraı antalap,

Ashynǵandy taptady,

El etegin qymqardy.

Altyn edi bir kezde,

Aǵash boldy tuǵyryń.

Tyıýsyz, tentek tóleńgit

Shyǵardy eldiń urlyqpen

Dyǵyry men yǵyryn.

Alalǵa qarsy han boldyń,

Tentekti súıep ne qurym.

Azǵan seni kórgende,

Qaınaıdy meniń zyǵyrym.

Ógizi boldyń jegilgen,

Aramdyqqa egilgen

Aıdaıtuǵyn shyǵyryń.

Quryq berdiń uryǵa,

Momyndy aldyń qyryńa.

Malsyzdardy taptadyń,

Maldylardy jaqtadyń,

Tentekti jasqap qaqpadyń,

Aramdardy aqtadyń,

Ósekshini maqtadyń,

Aramdyq boldy baqqanyń,

Orys boldy jaqqanyń.

Qashan seniń ashylar

Momyndarǵa qurylǵan

Qandy qara qaqpanyń?

Qaraǵysyz el men jurt

Tórelik túsken shaǵyńa.

Ie bolmaı aıryldyń

Atańnyń altyn taǵyna.

Qara tolqyn jaý toldy

Shyǵys, batys jaǵyńa.

Tulpardan týǵan tuqym eń,

Ere almadyń jabyǵa.

Etegin ashyp kim kúlmes

Azǵyndaǵan shaǵyńa.

Aldyńa kelse júginis,

Qaramaı qara, aǵyna,

Adaldy satyp paraǵa,

Bolystyń aram jaǵyna.

Rýhyna nálet keltirdiń,

Qabyń menen sabyńa.

Buzyqty qurap, el etip,

Qondyrdyń oń jaǵyńa.

Uryńa eldi tonatyp,

Búldire ber taǵy da!