BAILARǴA BERILMEGEN NYǴMET

Zamanynda Hazireti Isa (oǵan Allanyń sálemi bolsyn) paıǵambar bir aǵashtyń kóleńkesinde duǵa etip, arbada otyrǵan bir kisini kóredi. Duǵa etýshi kisige jaqyndap kelip qarasa eki kóziniń kórmeıtinin, tipti eki aıaǵynan júre almaıtynyn baıqaıdy. Aıtarlyqtaı qýatty da emes, álsiz hám aýrýshań ekeni kórinip tur. Biraq osynshalyqty múgedektigine qaramastan eki alaqanyn jaıyp Alladan duǵa etýde. Duǵa etkeni sonshalyqty árbir sózin aıtyp bolǵanda, baqyttan aspanǵa ushyp keterdeı hálde otyr edi. Onyń;

– Ýa Rabbym, baılarǵa bermegen nyǵmetti maǵan berdiń. Sol úshin de saǵan búkil aǵash jabyraqtarynyń sanyndaı shúkirler, maqtaýlar bolsyn, degen duǵasyn estip turǵan Isa paıǵambar janyna jaqyndap, sálem bergennen keıin;

– Ózdigińmen júre almaısyń, kózderińde kórmeıdi, óziń tym álsiz hám aýrýshań ekensiń. Alla saǵan járdemshi bolsyn. Biraq osyǵan qaramastan baılarǵa berilmegen nyǵmetterge ıe boldym dep oılaısyz jáne buǵan baqytty kúıde shúkir etýdesiz. Maǵan mynany aıtyńyzshy, «baıǵa berilmegen, saǵan berilgen nyǵmet» qandaı nyǵmet?, dep suraıdy. Sonda álgi kisi kózi kórmesede daýys shyqqan jaqqa júzin buryp;

– Myrzam, Alla maǵan sondaı bir júrek berdi, sol júregim arqyly Ony tanydym. Rabbym maǵan sondaı bir til berdi, sol til arqyly Ony zikir etýdemin. Alaıda, dúnıe baılyǵyn qolyna ustap, biraq júreginde esh tynyshtyǵy men baqyty joq, al tilinde shúkirshiligi joq baılar bar. Jaratqan Rabbym, ózdiginen júre almaıtyn aıaǵy aqsaq, kózi soqyr, denesi dertke shaldyqqan múgedek adamǵa osy nyǵmetti násip etti. Osyny oılasam, ózimdi qoıarǵa jer tappaı, qýanyshtan, Allaǵa degen mahabbattan ózimdi ustaı almaımyn. Baılarǵa bermegen nyǵmetti, maǵan násip etken Rabbyma shúkirler bolsyn! Ózimdi sol úshin de baqytty sezinemin, deıdi. Kózi kórmesede, júrek kózi ashyq bolǵan bul kisige Isa paıǵambar:

– Qolyńdy ber, dep qolynan ustap, álgi kisiniń kórmeıtin kózderin súıgen eken. Isa paıǵambardyń múbarak erinderi tıgen álgi kisiniń kózderi sol sátte ashylyp, qarsy aldynda turǵan Isa paıǵambardy kórip, qýanǵannan;

– Sen Allanyń qudiretimen ólilerdi tiriltken, aýrýlarǵa shıpa bergen Allanyń Elshisi emessiń be? – deıdi. Isa paıǵambarda;

– Kúmániń bar ma, deıdi kúlimsirep?

– Kúmánim joq, kózderim kórgenimen, aıaqtarym áli qozǵala alar emes? – deıdi. Sonda Isa paıǵambar;

– Sen turýǵa áreket etseń, aıaqtaryń da qalpyna keledi deıdi. Turýǵa áreket etkende aıaqtary da qozǵala bastaıdy. Aqyrynda tik turyp;

– Ýa, Allanyń Elshisi, bul bolǵan muǵjızalar Alladan emes pe?! Olaı bolsa, Oǵan shúkir etemin, – dep dereý sájdege basyn qoıǵan eken. Sájdede jatyp;

– Allahym! Ózińdi tanıtyn júrek hám shúkir etetin til bergen ediń. Endi myna álsiz qulyńa kóretin eki kóz, ózdigimen áreket etetin eki aıaq násip ettiń. Endi bul bergen nyǵmetterińe qalaısha shúkir etpeımin? – deıdi.

Osy arada bul oqıǵaǵa kýá bolyp, jınalyp qalǵan halyq Isa paıǵambarǵa qolyńyzdy súıýge ruqsat etińiz, – deıdi jamyrap. Sonda Paıǵambar;

– Meniń emes, sájdede jatqan kisiniń qolynan súıińizder, degen eken. Sonda kópshilik;

– Biz ony sájdege alyp barǵan nyǵmetke áý bastan ıe edik. Biraq biz ol sekildi nyǵmettiń qadirin munshalyqty sezinbegen ekenbiz, – deıdi. Sonda paıǵambar;

– Olaı bolsa, táfákkýr (ǵıbrat alyp, tereń oılaný) etińizder. Táfákkýr adam balasyn baqytqa jeteleıdi. Al táfákkýri joq pende árdaıym ózin baqytsyz sanaıdy, – degen eken.

Alla Taǵala Quran Kárimde: «Áı múminder! Allany jıe-jıe, kóp eske alyńdar, Ony erteli kesh pákteńder (dáripteńder)» deıdi (Ál-Ahzab súresi, 41-42-aıattar).

Daıyndaǵan – Turar TÚGELULY