BIRLIGIMIZDI BEKEMDEP, EL ÚShIN EŃBEK ETEIIK
«Qoǵamdaǵy birlik pen kelisimdi kózdiń qarashyǵyndaı saqtaýymyz kerek. Etnosaralyq jáne konfessııaaralyq qatynastyń qanshalyqty mańyzdy ekenin barlyq azamatymyz túsiný qajet. Biz qashan da alaýyzdyqqa qarsy tura bilgen elmiz.
Myqty memleket bolý úshin ulttyń uıysa bilýi aıryqsha mańyzdy. Shyn máninde uıymdasqan utady. «Yntymaq júrgen jerde yrys birge júredi» dep halqymyz beker aıtpaǵan. Bizdiń kúsh-qýatymyz berekeli birlikte. Endeshe birligimizdi bekemdep el úshin eńbek eteıik».
Búgin halyqqa Joldaý jasaǵan Memleket basshysy Qasym-Jomart Kemeluly osylaı dedi. Rasynda, qazaq kóshin bastaǵan keshegi han-sultandarymyz el basqarý isin eń áýeli ultty yntymaqqa uıystyrýdan bastaǵan.
Prezıdent aıtqandaı, qazir dúnıejúzindegi ahýal qubylmaly ári túrli syn-qaterlerge toly. Bizdiń elimiz de múlde jańa dáýirge qadam basty. Soǵan sáıkes, qoǵamdyq ómirdiń barlyq salasy túbegeıli ózgerýde.
Adam balasy sanaýly ǵumyrynda túrli synaqtar men syndarly sátterdi bastan keshedi. Ótkinshi qıyndyqty sabyrlyq, birlik, adamgershilik syndy qasıetter jeńedi. Biz el basyna kún týǵan talaı synaqty sátterdi yntymaq-birligimizdiń arqasynda eńserdik. Allaǵa shúkir, qoǵamdaǵy tynyshtyq pen turaqtylyq ıgi bastamalarymyzdyń júzege asýyna tikeleı septigin tıgizýde.
Din – búkil álemdegi ulttardyń rýhanı dúnıetanymyn baıytyp, adamzat balasynyń birlik pen tatýlyqta ómir súrýine óz úlesin qosatyn qýatty kúsh. Sondyqtan sol kúshti adamdar arasyndaǵy dostyq pen yntymaqqa jáne memleketimizdiń damýyna jumsaýymyz qajet. Ol úshin hákim Abaı aıtqan: «Birińdi qazaq, biriń dos, kórmeseń istiń bári bos» degen taǵylymdy sózin uran etýimiz qajet.
Alla Taǵala qasıetti Qurannyń «Máıda» súresiniń, 2-shi aıatynda adamzat balasyna:
وَتَعَاوَنُوا عَلَى الْبِرِّ وَالتَّقْوَىٰۖ وَلَا تَعَاوَنُوا عَلَى الْإِثْمِ وَالْعُدْوَانِۚ
«Izgi isterge, taqýalyqqa kómektesińder. Kúná jasaýǵa, dushpandyqqa járdemshi bolmańdar...» dep buıyrǵan.
Memleket basshysy Qasym-Jomart Kemeluly Joldaýda aıtqandaı, endeshe birligimizdi bekemdep el úshin eńbek eteıik.
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
