Boıdaǵy kemshilikti bilý de – úlken nyǵmet

Alla taǵala «Nazıǵat» súresiniń 40-41-shi aıatynda: «Al, kimde-kim kúnderdiń kúninde Rabbysynyń dárgeıine baratynyn oılap, shynymen qoryqqan hám nápsisin áýeıilikten tyıǵan bolsa, shúbásiz, onyń aqyr sońynda baryp panalaıtyn jeri jánnat bolmaq!» – degen.

Eger Alla Taǵala bireýge jaqsylyq qalasa, Oǵan óz aıyptaryn kórsetip qoıady. Muny Alla Taǵalanyń adamǵa bergen eń úlken jaqsylyǵy deýge bolady. Eger kemshilikter anyqtalsa ony emdeý joly da tabylady.

Adamnyń óz kemshiligin bilip alý joldary

1. Óz jan dúnıesiniń kemshilikterin tazalap, minezin kórkemdep kemeldendirgen, jan dúnıeni emdep tazartý joldaryn meńgergen ustazǵa shákirt bolý kerek. Mundaı ustaz shákirtin Óz perzentindeı kórip jaýapkershilikpen qaraıdy. Ustaz kemshilikterdi baıqap, anyqtap beredi. Sonymen qatar ustazdyń úıretýi boıynsha jan dúnıesin keselden emdep, tazartý kerek. Sonymen qatar kórkem minezdi boıyna sińirý kerek.
2. «Dos jylatyp aıtady, dushpan kúldirip aıtady» degen naqyl sózdi negizge alyp, shyndyqty kóretin jáne búgip qalmaı, eskertip aıtatyn dosqa júginý kerek bolady. Ol dos jaman isteri orynsyz aıtylǵan sózderi, uıat isteri, kórneý jáne kómes kemshilikterin kórip eskertedi. 

Omar Hattabuly (r.a.): «Meniń kemshilikterimdi ózime syıǵa tartqan adamǵa Alla Taǵalanyń rahmaty bolsyn», – deıtin edi.

Daýd át-Táııden: «Nege adamdardan oqshaýlanyp, jyraqqa kettińiz? Nege adamdarmen aralaspaısyz?» – degende: «Meniń aıyptarymdy jasyratyn qaýymdy ne isteımin?!» – degen eken.

Nasıhat jaspp, kemshilikterimizdi betke aıtatyn adamdardy ımannyń álsizdiginen jaman kórip jatamyz. Alla Taǵala barshamyzǵa týra joldy násip etkeı! Kemshilikterimizdi ózimizgeanyq etip kórsetkeı! Ózi taýfıq pen Hıdaıat berip rýhanı keselder men kemshilikterden saqtaǵaı! Ámın!

«Ál-Ázhar» ýnıversıtetiniń saraptaýynan ótken
 Shaıh Halıd Ismaǵıl Sýlaımannyń
«Jamıýl ýasaıa fıd-dını ýad-dýnıa»
«Din jáne dúnıedegi ósıetter jıyntyǵy» atty eńbeginen
 jáne shaıh Mýhammad Sadyq Mýhammad Iýsýftyń
«Rýhı tarbııa» kitaptary negizinde ázirlegen
 «Áljan ana» meshitiniń bas ımamy Ádilhan Imanáliuly