BOISUNÝShYLYǴY MOL «ZAǴIP» JAN

Salıhtardyń ishinde taqýalyǵy mol, qulshylyqtaǵy kemshiligin kóre bilgen, jyldar boıy basyn aspanǵa kótermeı, uıaty men kishipeıildiliginen únemi ıilip júretin adamdar bar edi. Solardyń biri – Paıǵambarymyzdyń (s.a.ý.) kózi tirisinde musylman bolǵan, biraq ony kóre almaǵan taqýa adamnyń biri Rábıǵ ıbn Hýsáım.

Rabıǵ ıbn Hýsáım (r.a.) qulshylyǵy tolyq, taqýa adam bolatyn. Tipti, ol haramǵa kózim túsip ketpesin dep, jıi-jıi kózderin jumyp júrgendikten, jurt ony soqyr dep oılaıtyn. Ol jıyrma jyldaı sahaba Ibn Masǵýdtyń (r.a.) úıinde dáris alady. Bir kúni Ibn Masǵýdtyń qyzmetshisi ony soqyr dep oılap: «Jaqyn dosyńyz Rabıǵ ıbn Hýsáım kórý qabiletinen aıyrylǵan zaǵıp jan eken. Men esik ashqan saıyn beısharanyń kózin jumyp otyrǵanyn kóremin», – deıdi. Máseleniń mán-jaıyn biletin Ibn Masǵýd (r.a.) bolsa, myna sózderdi estip, biraz kúlip alady.

Ibn Masǵýd (r.a.) Rabıǵ ıbn Hýsáımniń Allaǵa erekshe boısunýshylyǵyna dán rıza bolyp, oǵan jıi-jıi bylaı deıtin: «Ýa, Rabıǵ! Paıǵambarymyz (s.a.ý.) seni kórgende ǵoı, seni maqtan tutar edi. Seni qatty jaqsy kórer edi, seni kórgende saǵan  kúlimsirer edi».

Bir kúni Rabıǵ ıbn Hýsáım (r.a.) Ibn Masǵýdpen (r.a.) birge ustalar bazarynan ótip bara jatyp, otty úrlep jatqan kórikke kózi túsedi. Rabıǵdyń esine tozaq oty túsip, qoryqqanynan esinen tanyp, jerge qulaıdy. Ibn Masǵýd bas jaǵyna otyryp, namaz ýaqyty kirgenshe  esin jıǵanyn kútedi. Biraq ol esin jımaǵandyqtan, ony arqalap úıine ákeldi. Rabıǵ esinen tanyp bir kún boıy jatady, al Ibn Masǵýd (r.a.) tóseginiń qasynda ony otyryp kútetin jáne aınalasyndaǵylarǵa bul esinen taný Alladan qorqýdyń belgisi ekenin aıtyp, taqýalyǵyn madaqtaıtyn. (Rııaz ýl-Mýkının)