Bul dúnıe – aqyrettiń egindigi

22 maýsym 2021 4959 0
Оqý rejımi

Máńgilik meken bolǵan Aqyrettiń qamyn oılamaǵan pendeler ótkinshi ómirdiń qyzyǵyna aldanyp, kúıbeń tirshiliktiń qamymen qashanǵy júredi eken? Kúnderdiń kúninde ajal kelip tap bergende ol pendege syltaý tabyla ma? Árıne, joq! Alla Taǵala qasıetti Quranda: «Árbir tiri jan (bir kúni) ólimniń dámin mindetti túrde tatady. Qııamet kúni bul dúnıede istegen isterińniń qarymyn tolyq alasyńdar. Kimde-kim tozaqtan aýlaq áketilip, jumaqqa kirse, zor jetistikke hám maqsat-muratyna jetkeni. (Bilip qoıyńdar), bul dúnıeniń tirshiligi aldamshy qyzyqtan, jalǵan buıym-boqshadan basqa túk te emes»[1], - deıdi. Rabbymyz Alla Taǵala taǵy bir kórkem aıatta: «Bilip qoıyńdar, dúnıeniń tirshiligi oıyn-kúlki, saýyq-saıran, sán-saltanat jáne ózara maqtan (ıaǵnı, mansap, ataq-abyroı, mal-múlik, bala-shaǵa hám keskin kelbetpen maqtaný) ǵana, sondaı-aq, kóbirek dúnıe jııý jáne úrim-butaqty kóbeıtý jolyndaǵy báseke ǵana. Bul bir jaýynǵa uqsaıdy; sol jaýynnyń arqasynda jaıqalyp ósken ósimdikter sharýalarǵa qatty unap, tóbeleri kókke jetedi. Alaıda, artynsha álgi ósimdikterdiń sarǵaıyp, solyp qalǵanyn kóresiń hám sodan keıin qý saban men qıqymǵa aınalady. Mine, dúnıeniń qý tirshiligi degen – osy. Al aqıretke kelsek, onda ıa aýyr azap bolady, ıakı Allanyń (tosyn syı-syıapattarǵa toly) keshirimi men sheksiz razylyǵy bolady. Iá, dúnıeniń tirshiligi aldamshy ári ótkinshi qyzyqtan basqa eshteńe de emes»[2], – degen.

Ardaqty Paıǵambarymyz Muhammed Mustafa (s.ǵ.s.) sahabalaryna: «Allanyń atymen ant eteıin! Men sizderge kedeılik úshin emes, dúnıeniń sońynan túsip kete me dep alańdaımyn. Bizge deıin ótken qaýymdar dúnıemen jarysqany sekildi, sender de dúnıemen básekege túsip, olardy dúnıe sońynda joıyp jibergeni sııaqty, senderdi de joıyp jibere me dep qorqamyn», - dep óz úmmetiniń taǵdyry úshin qatty ýaıymdaǵan. Rasymen de búgingi qoǵamda Aqyret isinen buryn dúnıe tirshiligine qatty mán beretin adamdar jıi kezdesip jatady. Ataqty sahaba Abdýllah ıbn Masǵýd (r.a.): «Shyn máninde sender merzimi qysqa, shektelgen, kún men tún arpalysqan ómirde jasaısyńdar. Eger sender ómirde jaqsylyqty egin etip ekseńder, tez ýaqytta onyń jemisi senerdi ańsaǵan armandaryńa jetkizgenin kóresińder. Al eger ómirde jamandyqty ekseńder, tez ýaqytta onyń jemisi orny tolmas ókinishke aınalǵanyn kóresińder. Óıtkeni, árbir egin ekken dıhan óziniń ekken egininiń jemisin jınaıdy», - dese, Imam Hazım bylaı degen eken: «Aqyret azyǵy jeter-jetpes az, qaı kezde adam men amal arasynda tosqaýyl ornasa, qaıǵy men ókinishten ózge esh nárse qalmaıdy. Sol kezde adam óziniń amal qylýǵa shamasy jetken shaǵyna qaıtýǵa armandaıdy. Biraq, armandaǵan oǵan paıda bermeıdi». Endeshe, bul dúnıe – aqyrettiń egini ekenin umytpaıyq!

Erbolat Aıtbaıuly


[1] «Álı Imran» súresi, 185-aıat.
[2] «Hadıd» súresi, 20-aıat.

Pіkіrler Kіrý