DÚNIE – JEMTIK, MEN – TÓBET

Sózim bar da, kózim joq,
Kózim bar dep jatpadym:
Bı men bekti jaqtadym,
Baı, myrzany maqtadym.
Báıbisheniń moınyna
Jyrdan alqa taqqanym.
Ósek boldy baqqanym –
Momynǵa qurǵan qaqpanym.
Ósekshi – táńiri dushpany,
Kúnámdi qalaı aqtadym?!
Az nársege ant iship,
Arýaqty attadym.
Qylmystyny qyzyqtap,
Mandaıynan sıpadym,
Qabaǵyna qaqpadym.
Bárine men kiriptar,
Qaısysy meniń tapqanym?!
Bireýdiń otyn úrledim,
Óz otymdy jaqpadym,
Sonda daǵy ońbadym:
Kón shalbar túspeı butymnan,
Qys bolsa – tapshy qyzyldan,
Jaz bolsa – shala jutymnan.
Adal sopy men emes
Pirdiń sózin tutynǵan.
Saýdager sarttaı qaıtty ómir
Qumar oınap utylǵan.
Móńirep jurtqa oı qaıtty
Buzaýy ólgen sıyrdaı.
Lápsi – tóbet qabaǵan:
Jemtik kórse, tura ma
Yryldap, tanaý jıyrmaı?!
Ózimnen ózim qyzǵanyp,
Azyn-aýlaq jıǵanym
Ózime de buıyrmaı.
Kúnám – joıqyn, táýbem – az,
Tirshilikten ne taptym?
Dúnıe – jemtik, men – tóbet,
Sony baqpaı, ne baqtym?
Yryldasyp árkimmen,
Ne qapqyzdym, ne kaptym...

Dýlat BABATAIULY