Eki jas nekege deıin ózara qandaı suraqtar qoıýy tıis?

Bul maqala on eki suraqtan, ıaǵnı er adam óziniń úılenýge bel baılaǵan qalyńdyǵyna jáne áıel adam óziniń turmysqa shyǵýǵa bel baılaǵan erine qoıýǵa tıisti on suraqtan turady. Bul jıyrma eki suraq erli-zaıyptylardyń baqytty otbasylyq ómir súrýleriniń kepili bolyp tabylatyn, ıaǵnı quqyqtary men mindetterin saqtaýdy qamtıdy.

​Er adamnyń qalyńdyqqa qoıýǵa tıisti suraqtary:

1. Neke baılyq nemese sulýlyq úshin emes, jaqsy otbasyn qurý úshin, ıaǵnı nápsini tyıyp, urpaq jalǵastyrý úshin jasalady. Siz osy jaıly ne oılaısyz?

2. Alla Taǵala «Nısa» súresiniń 34-shi aıatynda otbasynyń jaýapkershiligin er adamǵa júktegen. Siz onymen kelisesiz be?

3. Islamnyń talaptary boıynsha, áıel adamǵa óziniń erinen basqa eshkimge qaraýǵa bolmaıdy, sondyqtan áıel adam bóten erlerdiń aldynda jabyq kıinip júrýi kerek. Osy suraq boıynsha sizdiń pikirińiz qandaı?

4. Áıeli óziniń erin oǵan unaıtyndaı etip ataýy kerek. Sonymen qosa ol óziniń kúıeýin jyly júzben qarsy alyp, júris-turysymen oǵan syı-qurmet kórsetýi kerek. Siz osymen kelisesiz be?

5. Osy ómirde Alla Taǵala barlyǵymyzǵa synaq beredi. Siz jumyssyzdyq pen kedeılikke shydaı alar ma edińiz? Jáne ózińizdi baı áıeldermen kúndestikten saqtaı alasyz ba?

6. Kóbinese áıel adam úıde bolýy tıis, úı sharýalarymen aınalysýy kerek. Eger de úıinen shyqqysy kelse, onda ol óziniń kúıeýinen ruqsat suraýy qajet. Buǵan ne deısiz?

7. Áıel adam óziniń kúıeýiniń problemalaryn túsinýi kerek jáne ony jalǵyz ózin sol máselelerimen qaldyrmaýy tıis. Sondaı-aq kúıeýi de áıeliniń máselelerine de túsinistik bildirýi qajet. Siz osy týraly ne oılaısyz?

8. Erli-zaıyptylar bir-biriniń qupııalaryn jáne kemshilikterin ózderiniń ata-analaryna nemese basqa bireýlerge jaıyp salmaýy kerek. Otbasylyq qupııa, syrlaryn qatań saqtaý qajet. Siz osymen kelisesiz be?

9. Áıel kúıeýiniń ata-anasyna jáne týystaryna óziniń týǵan ata-anasyna kórsetkendeı mahabbat pen syılastyq kórsetýi tıis. Siz osy týraly ne oılaısyz?

10. Eger erli-zaıyptylardyń týystary nemese tipti olardyń ata-analary nemese týǵan aǵasy jáne apalary kórealmaýshylyq nemese opasyzdyq sebepterimen olardyń nekesin buzatyn bolsa, áıeli men kúıeýi árqashan bir-birin qoldap, otbasylyq qarym-qatynasty saqtaýlary qajet. Siz osy jaıly ne oılaısyz?

11. Men, basqa da kez kelgen adam sııaqty, áıelderdiń sulýlyǵy men tartymdylyǵyna senemin. Alaıda, syrt kelbet pen tán sulýlyǵy eń bastysy emes dep oılaımyn. Siz menimen kelisesiz be?

12. Sharıǵat boıynsha da, ádet-ǵuryp jaǵynan da áıel adam óziniń kúıeýin tyńdaýy kerek. Eger áıeli erine baǵynbasa, onda ol óziniń mindetteriniń birin oryndamaǵan bolyp sanalady, jáne sondyqtan da kúıeýi áıeline kúneltýge qajet qarjymen qamtamasyz etpeýi múmkin. Osy jaıynda sizdiń pikirińiz qandaı?

Qalyńdyqtyń erine qoıýǵa tıisti suraqtary:

1. Eri áıelin azyq-túlikpen jáne oǵan qajetti zattarmen qamtamasyz etýi tıis, al eger materıaldyq jaǵdaıy jetetin bolsa, onda áıeline baǵaly syılyqtar, áshekeıler áperýi tıis. Eger áıeli syrqattanyp qalsa, kúıeýi ony emdeýi qajet. Siz osymen kelisesiz be?

2. Áıeline masyl boldyń dep qaramaýy kerek, sebebi ol januıańnyń negizgi quraýshysy. Islamǵa sáıkes, áıel – ol Allanyń bergen amanaty, sondyqtan kúıeýi áıeline syılastyqpen jáne túsinistikpen qaraýy qajet. Sonymen qosa, ıslamda erli-zaıyptylardy «bir-birine jamylǵy» retinde sıpattaıdy. Osy suraq boıynsha sizdiń pikirińiz qandaı?

3. Er adam áıelin urýǵa qaqysy joq. Eger de kúıeýi áıeline qol kótergen jaǵdaı bolyp qalsa, onda ol dinde bekitilgendeı, oǵan ornyn toltyratyndaı ótemaqy tóleýi tıis. Eger áıeli óziniń kúıeýine baǵynbasa, onda aldymen ony aqylǵa salý qajet. Siz osymen kelisesiz be?

4. Er adam óziniń áıeli sııaqty jeke basynyń gıgıenasyn, tazalyǵyn saqtap, ózine qaraýy kerek. Osy jaıynda ne oılaısyz?

5. Kúıeýi áıeline, ıslam dininde shektelmegen, úılený saltanaty nemese jerleý rásimderine barýyna kedergi jasamaýy tıis. Eger de ol oǵan bóget jasaıtyn bolsa, onda áıeli úı jınaý, kir jýý, taǵam ázirleý sııaqty óziniń mindetterin oryndaýdan bas tartýyna bolady. Osy týraly ne oılaısyz?

6. Kúıeýiniń óziniń áıeline degen mahabbaty báseńdemeýi úshin, ol áıeli úıge kelgende sálemdesip, úıden shyǵarda qoshtasýy kerek. Ne aıtasyz?

7. Allanyń elshisi Paıǵambarymyz (s.ǵ.s.) jasaǵandaı, kúıeýi áıeline úı sharýasyn oryndaýda kómektesýi qajet. Siz osymen kelisesiz be?

8. Eger áıeli qandaı-da bir jańsaqtyq is jasap qoısa, onda kúıeýi oǵan aıǵaılap, daýys kóterip, ursýǵa bolmaıdy. Siz osy jaıly ne oılaısyz?

9. Turmystaǵy áıel adal aqsha taýyp, jumys istese, siz oǵan qalaı qaraısyz?

10. Eri óziniń áıeline kúdikpen, kúmánmen qaramaýy tıis. Sondyqtan ol ósek, ǵaıbat aıtýshylarǵa jáne fıtna taratýshylarǵa senbeýi kerek, tipti onyń óziniń ata-analary jáne basqa da adamdar ne aıtsa da bárine sene bermeýi kerek.