Erkektiń jynystyq mindeti

Er adam jubaıyn tósek qatynasynsyz qaldyrmaýy kerek. Sebebi, neke arqyly erli-zaıyptylardyń jynystyq qatynas aqylary da paıda bolady. Sondyqtan kúıeýi jubaıynyń bul quqyna nemquraıly qaramaýy tıis. Myna bir oqıǵa osy turǵydan úmbetke óte jaqsy sabaq bolarlyq mánge ıe. Sahaba Abdýllah ıbn Amr (r.a.) kún saıyn oraza ustap, túnin Quran oqýmen ótkizetin. Jubaıyna kóp jaqyndaı bermeıtin. Týystarymen shúıirkelesýge ýaqyt bólmeıtin. Bir kúni áıeli qaıyn atasyna osyny aıtyp shaǵymdanady. Abdýllanyń ákesi jaǵdaıdy Paıǵambarymyzǵa bildiredi. Sonda Paıǵambarymyz (sallallahý aláıhı ýá sállám) álgi sahabasyn shaqyryp alyp: «Jubaıyńnyń sende aqysy bar. Qonaqtaryńnyń da aqysy bar, deneńniń de aqysy bar. Bulardy umyt qaldyrma», – dep ósıet aıtady. Árıne, túndi Quran oqýmen ótkizgen jaqsy. Biraq adam balasy qarsy jynystyń da aqysyn umytpaı, oǵan da kóńil bólýi kerek. Kúndizderi oraza ustaǵan da jaqsy. Biraq úıge keletin qonaqtar ózderimen birge dastarhanǵa otyryp, shúıirkileskisi kelýi múmkin. Sondyqtan paryz orazalardyń tysynda nápil oraza ustaǵan kezde  úıge qonaq keletin bolsa, onda sol kúngi orazany buzyp, qonaqtarmen birge otyrǵany durys. Onyń ústine adam kúnige oraza ustaıtyn bolsa, álsireýi de múmkin. Sondyqtan Paıǵambarymyz (sallallahý aláıhı ýá sállám) osyny eskertip, «Deneńniń de aqysy bar» degen.

Islam quqyǵynda erli-zaıyptylardyń arasynda bir jyl boıy jynystyq qatynas bolmasa jáne áıel osy sebepti sotqa shaǵymdansa, áıeldiń tilegi boıynsha sot olardyń ajyrasýyna úkim shyǵarady delingen.

Shámshat Ádilbaeva