Eshnárse zııanyn tıgize almaıdy…

أَعُوذُ بِكَلِمَاتِ اللهِ التَّامَّاتِ مِنْ شَرِّ مَا خَلَقَ

Oqylýy: Á‘ýýzý bı kálımáátı-llááhıt-táámmáátı mın shárrı má haláq.

Maǵynasy: Allanyń minsiz sózderimen[1] kúlli jaratylystyń kesir-kesapatynan saqtanamyn!

Uzaq jyldar boıy ardaqty Paıǵambarymyzben (s.ǵ.s.) birge bolý qurmetine bólengen sahaba Ábý Huraıra (r.a.) bul duǵa jaıly myna oqıǵany tilge tıek etken: «Bir kisi Alla elshisine (s.ǵ.s.): Keshe túnde meni shaıan shaǵyp aldy, – dep, túni boıy kóz ilmegenin aıtyp, muńyn shaqty. Sonda Paıǵambarymyz (s.ǵ.s.) oǵan: «Eger keshkisin myna duǵany oqyǵanyńda, ol seni shaqpas edi», – degen eken.

Sondaı-aq, Imam Tırmızıdiń eńbeginde Sýháıl ıbn Ábý Salıh (r.a.): «Aınalamyzdaǵy adamdardyń barlyǵy osy duǵany jattap alyp, kún saıyn keshkisin oqyp júretin. Birde qyzmetshi áıelderdiń birin shaıan shaǵyp aldy, biraq, ol áıel odan eshqandaı da zııan shekpedi», – degen. Joǵaryda keltirilgen derekterge qosa osy duǵaǵa qatysty basqa bir hadıste Paıǵambarymyzdyń (s.ǵ.s.): «Kimde kim qandaı da bir jerge (panajaıǵa) at basyn tiregende myna duǵany oqysa, sol jerden attanyp ketkenge deıin oǵan esh nárse zııanyn tıgize almaıdy», – dep aıtqany rıýaıat etilgen.

«Paıǵambarymyzdyń (s.ǵ.s.) tańǵy jáne keshki duǵalary» kitabynan