Ishimdik ishken ana (qyzyqty zertteý)

Shveıtsarııalyq dáriger mynadaı qyzyq jaıdy baıandap jazady. Dáriger dúısenbi jáne beısenbi kúnderi emshek emgennen keıin, aıaq-qoly dirildep talyp qala beretin náresteniń syrqatynyń sebebin anyqtaıdy. Álgi náreste tek qana dúısenbi jáne beısenbi kúnderi talyp qalatyn kórinedi. Dáriger áýeli anasyn tekserip, deni saý ekendigin anyqtaıdy. Sonan soń teksere kele sábıdiń anasynyń aptasyna eki ret, sársenbi jáne jeksenbi kúnderi jumysqa barmaı demalatynyn anyqtaıdy. Mine, dál osy demalys kúnderinde álgi áıel azdap sharap urttaıtyn kórinedi. Sóıtip kelesi kúni ana qanyndaǵy alkogol emshek súti arqyly náresteniń organızmine ótip, ony talma aýrýǵa ushyratqany anyqtalady. Osy oqıǵadan keıin áıel baıǵus sharap urttaýdy sap tyıady jáne kóp ótpeı náresteniń qaltyrap-dirildep talyp qalýy da basylǵan eken.

Medıtsınalyq praktıkada bolǵan taǵy bir qyzyqty jaǵdaı: ókpesi qabynyp aýyrǵan 6 aılyq balanyń keýdesine sheshesi kúnine 3 ret araqpen kompress jasaıdy. Kompresti úshinshi kúni jasaǵanda, náresteniń ýlanǵany baıqalady. Sábı esinen tanyp, terisi bozarady. Denesinen sýyq ter shyǵyp, qyzýy kóteriledi. Náresteniń deminen spırttiń ısi shyǵa bastaıdy. Osylaısha náreste 17 saǵattaı aýyr halde jatyp, 4 táýlikten keıin ǵana esin áreń jıǵan kórinedi. Ókinishke oraı, ata-analar kóp jaǵdaıda spırttik ónimderdi emdik maqsatpen jas balalarǵa qoldana beredi.

Nurbek Qaıyrmuhammed