KEShIRIM – JÚREKTIŃ SADAQASY
Alla Taǵala adam balasyn adamdar arqyly synaıdy.
Bireýi seni renjitedi, bireýi sóz aıtady, bireýi ádiletsizdik jasaıdy.
Bular – jaı adamdar emes, Allanyń qolyndaǵy aına.
Sol aınalar arqyly sen óz júregińdi kóresiń: renjip pe ediń, ashýlanyp pa ediń, álde keshire aldyń ba?
Paıǵambarymyz Muhammed (s.ǵ.s.) sahabalaryna:
«Ábý Damdam degen bir adam bar edi. Ol ár tań saıyn: “Ýa, Alla! Men adamdardyń maǵan istegenderiniń bárin keshtim!” – dep aıtatyn edi», – degen.
Osy bir qarapaıym sózdiń ishinde úlken syr jatyr.
Keshirim – tek jaqsy minez emes, bul rýhanı amal,
júrekti nápsiniń tutqynynan bosatatyn ǵıbadat.
Bizdiń nápsimiz árkez «meni renjitti», «maǵan ádiletsizdik jasady» dep aıqaılaıdy.
Ol ósh alýdy, ózin qorǵaýdy qalaıdy.
Biraq rýh — basqa.
Rýh: «Meniń isim Allaǵa amanat, men adamdardan emes, Alladan kútemin», — deıdi.
Kim osy rýhtyń únine qulaq assa – sol shyn er.
Ábý Damdam eshkimge kek saqtamady, sebebi ol júregin Allaǵa bos ustady.
Júrekte renish bolsa, ol jerge Allanyń nury túspeıdi.
Sondyqtan keshirim – júrektiń tazalyǵynyń kilti.
Keshirim – zikirdiń de, duǵanyń da qabyl bolýyna sebep.
Keıde bir adamǵa ókpelep, jyldar boıy sol aýyrtpalyqty arqalap júremiz.
Ol adam áldeqashan umytyp ketken, al biz áli de renishtiń otyn ishimizde saqtaımyz.
Sol ot – rýhanı tynyshtyqty órteıdi.
Sol sebepti Alla Elshisi (s.ǵ.s.) bizge Ábý Damdamdy mysal etti.
Óıtkeni ol ár tań saıyn otty sóndirip, júregin nurmen toltyratyn.
Keshirim – álsizdiktiń belgisi emes.
Keshirim – Allaǵa súıenýdiń, júrektiń keńdiginiń belgisi.
Adamdy keshirý – Allanyń razylyǵyn izdeý.
Sebebi kim adamdardy keshirse, oǵan Alla da meıirimmen qaraıdy.
«Bireýdiń minin keshirseń, Saǵan da Qudaı keshedi» (Shákárim).
Quranda: «Kim keshirse jáne túzetse – onyń syıy Allanyń quzyrynda» – deıdi.
(Shýra súresi, 40-aıat)
Endeshe, ár tań saıyn Ábý Damdam sııaqty aıtaıyq:
«Ýa, Rabbym! Men búgin adamdardyń maǵan istegenderiniń bárin keshtim.
Men renjýden bas tarttym.
Júregim Saǵan ǵana bos bolsyn!»
Sonda Alla bizdiń júregimizge tynyshtyq, tilimizge raqym,
isimizge bereke beredi.
