Hasan Basrı hıkmetteri

24 qarasha 2020 526 0
Оqý rejımi

Ol Madına shaharynda dúnıe kelgen. Sheshesi Haıra musylmandar anasy Úmmý Sálámanyń (r.a.) shańyraǵynda tárbıe kórgen áıel. Náresege Hasan dep esim qoıǵan da Úmmý Sáláma (r.a.). Ol paıǵambar jubaılarynyń (r.a.) shańyraǵynda ósti. Keıinirek, ata-anasy Basra qalasyna kóship, sanaly ǵumyryn sol shaharda ótkizgendikten jurt Hasan Basrı dep atap ketti. Mine, osy ǵulama tabıǵınniń danalyq pen hıkmetke tola taǵylymdy sózderinen teńizden tamshydaı úzindi.

Hasan Basrıden (r.a.): «Dúnıe qyzyǵynan baz keshýińizdiń syry nede?», - dep suraǵanda, ǵulama: «Rızyq-nesibemdi menen basqa eshkim almaıtynyn bilem, sondyqtan júregim jaı tapty. Sharýamdy ózimnen basqa eshkim istemeıtinin bilem, sondyqtan ózim aınalystym. Alla Taǵala árbir qımyl-áreketimdi baqylap turǵanyn bilem, sondyqtan kúná isteýden uıaldym. Ólim meni kútip turǵanyn bilem, sondyqtan Allamen qaýyshý kúnine daıyndyq qamyn jasadym», - degen eken.

Hasan Basrı: «Alla Taǵalanyń pendeden teris aınalǵandyǵynyń bir belgisi – adamǵa qajet emes sharýamen jumysbasty etýi»,-degen eken.

Hasan Basrı: «Árbir úmbettiń tabynatyn puty bolǵan. Bul úmbettiń puty – dınar men dırham», - degen eken.

Hasan Basrı: «Eı, adam balasy! Seniń kúndiziń (ýaqytyń) – qonaǵyń. Oǵan jaqsylap qara. Eger jaqsy mámilede bolsań, alǵysyn aıtyp qosh aıtysady. Al, jamandyq jasasań, seni masqaralap shyǵyp ketedi», - degen eken.

Hasan Basrı: «Musylman baýyrdyń muń-muqtajyn rettep berý maǵan bir aı ıǵtıkaf jasaǵannan unamdy», - degen eken.

Hasan Basrı: «Bireýdiń sózin saǵan jetkizgen adamnan saq bol. Óıtkeni, ol seniń sózińdi basqa bireýge jetkizedi», - degen eken.

Hasan Basrı: «Sabyr – jánnat qazynalarynyń biri. Adam barlyq jaqsylyqqa bir sát sabyrlyq kórsetýmen qol jetkizedi», - degen eken.

 

Muhammed Ibrahım

Pіkіrler Kіrý