Haziret Álıdiń ósıeti

Kúmáıil ıbn Zııad (r.a.) áńgimeleýde:

«Birde meni haziret Álı (r.a.) qolymnan jetektegen kúıi aýyl syrtyna shyqtyq. Bir tóbeniń basyna bardyq. Biraz únsiz otyrǵannan keıin ol maǵan mynany aıtty:

–  Kúmáıil, qazir meniń aıtqanymdy jaqsylap uǵyp al. Adamdar úsh túrge jatady. Alǵashqy top – ǵulamalar. Ekinshiler – Allah jolynda bilim izdenýshiler. Úshinshi top – nadan qara tobyr. Sońǵylardyń tabanynda búr bolmaıdy, jel qaıda aıdasa, sonda júre beredi. Bilim nurynan maqurym bolǵandyqtan, olardyń jeke dúnıetanymy da jutań tartyp turady.

Bilim maldan qaıyrly. Bilim seni qorǵaıdy, al maldy sen qorǵaısyń. Bilim amalmen tolysady, mal jumsalǵan saıyn azaıady. Ǵalymdy jaqsy kórý – kim-kimge de mindet. Bilim ǵalymǵa ómir boıy qadir-qurmet ákeledi, tipti ǵalym adam ólgennen keıin de jurt sol biliminiń arqasynda eske alady. Biraq malmen bitken abyroı-ataq mal ketkende birge ketedi. Tiri kúninde-aq óli sanalǵan baılar, ózi ólse de sózi ólmeıtin ǵalymdar bar, – dep kúrsinip únsiz qaldy.

Bir ýaqytta qolymen keýdesin kórsetip: – Myna jerdegi ilimdi tarqatyp aıtyp, bólise alatyn bireýdi taba almadym. Shyn ǵulamalardyń ólýimen bilim de óledi eken. Joq, Rabbym, bulaı etpe. Bar ekenińdi dáleldeıtin ǵalymdar bul dúnıege kerek. Olar ómirde óte az, biraq Allah aldyndaǵy dárejeleri óte joǵary. Allah uly dinin solar arqyly qorǵaıdy. Ol ǵalymdar ózderine júktelgen amanatty laıyq bolǵandarǵa ǵana jetkizedi. Dúnıe qyzyǵyna masaıraǵandardyń arasynda olar barynsha bııazy, jumsaq. Mine, bular – aqıqatty qorǵaýshylar, Islamnyń qyzmetshileri. Solarmen jolyǵa alǵanymda!... – dep muńaıdy.»  

Qudaıberdi Baǵashar