KISI BOLAR BALANYŃ BELGISI

Kisi bolar balanyń-
Kisimenen isi bar,
Kisi bolmas balanyń-
Kisimenen nesi bar, 
- deıdi qazaq maqaly.

Dástúrli qazaq ortasynda jas bala el isine erterek aralasady. Sol aýyldyń qarııalary men úlkenderi jas balany ár ýaqyt synap, sózge aralastyryp, isine baǵa berip tárbıelep otyrady. Adam minezi jas bala kezinde –aq qalyptasyp, ata-anadan, qorshaǵan ortasynan alǵan úlgisin erte kórsete bastaıdy. Tek osyny ýaqytyly baǵalap, qorytyndylap, qalypqa túsirip otyratyn mańaıynda kóregen aqsaqalyń bolsyn. Ár ýaqytta óz tirshiligin tabıǵatqa, sharýashylyǵyna shendestirip otyratyn eldiń úlkenderi jaqsy bala týraly-
«Qoshqar bolar qozynyń
Mańdaı jaǵy dóń keler,
Adam bolar balanyń
Etek- jeńi keń keler,» -
dep balanyń ár minezinen, isinen irilikti, kisilikti izdep, sol minezdiń shetin kórip qalsa arqadan qaǵyp, qanattandyryp otyrady. «Adam bolatyn bala alysqa qaraıdy» degen, osyndaı qamqorlyqty kórgen qazaq balasy esi bolsa qashanda eldiń seniminen shyǵýǵa baryn salady. Burynǵylardyń «Kisi bolar bala – kisesinen belgili, at bolatyn qulyn -múshesinen belgili» degen de sózi bar. 
Sonymen «kisi» kim, «adam» kim ? Ekeýi bir uǵym ba, arasynda aıyrmashylyq bar ma ?

J.Artyqbaevtyń fb paraqshasynan