Kúná jasaýǵa bolatyn 5 nárse
Birde Ibrahım Ibn Adhamǵa bir zalym adam kelip:
- Men kúná jasamaı júre almaımyn, sondyqtan maǵan kómektesetin áldebir nárseni keńes etshi, - deıdi. Ibrahım:
- Eger sen men aıtqan bes nárseniń bireýin oryndasań, qansha qalasań da kúná jasaı alasyń jáne Alla Taǵalanyń buıryǵyna qulaq aspaǵandardyń qatarynan bolmaısyń, - dep sózin jalǵastyrady.
– Birinshi, eger sen kúná jasap, Allaǵa qulaq asqyń kelmese, onyń bergen nesibesinen jeme.
– Osy dúnıedegi búkil nesibe Allaǵa tıesili bolsa Oǵan tıesili emes nesibeni qaıdan alamyn? – deıdi álgi adam.
– Onda Alla Taǵalanyń bergenin jep, Oǵan qalaı qulaq aspaısyń? – deıdi Ibn Adham keıip.
– Ekinshi, eger Allaǵa qulaq asqyń kelmese, Onyń jerin tastap, Oǵan tıesili emes jerlerge baryp tur.
– Biraq barlyq jer men kók Allaǵa tıesili ǵoı. Kúná jasaý úshin men qaıda barýym kerek? - deıdi álgi adam.
– Sonda sen Alla Taǵalanyń jerinde, Onyń ıeliginde turyp Oǵan qalaı qulaq aspaısyń? - deıdi Ibrahım.
– Úshinshi, kúná jasaǵyń kelgen kezde ózińdi Alla Taǵala kórmeıtin jerge bar.
– O, Ibrahım, sen ne aıtyp tursyń? Ondaı jerdi men qaıdan tabamyn? Alla Taǵala kórmeıtin jer joq qoı, – deıdi álgi adam.
– Sen Alla Taǵalanyń kórmeıtin jeri joq ekenin bile turyp, Onyń sen ne isteseńde kóretinin bile turyp qalaı ǵana kúná jasamaqsyń? – deıdi Ibrahım.
– Tórtinshi, janyńdy alýǵa ajal perishtesi kelgende, kúnálaryńa táýbe etý úshin onyń kúte turýyn sura.
– Bul múmkin emes qoı, ajal perishtesi eshkimge ýaqyt bermeıdi ǵoı – deıdi álgi adam.
– Sonda sen kez-kelgen sátte ajal perishtesi kelip janyńdy alýy múmkin ekenin bile tura Alla Taǵalanyń buıyrǵanyna qalaı qulaq aspaısyń? – dep suraıdy Ibrahım. Suraǵyna jaýap bolmaǵan soń sózin jalǵastyryp:
- Jáne eń sońǵy besinshi shart. Sony oryndasań, qalaýyńsha kúná jasaı alasyń. Tozaqqa jaýapty perishteler seni Tozaqqa jetektegende onda barýdan bas tart, - deıdi. Sol kezde aıtarǵa jaýaby, jasarǵa amaly qalmaǵan álgi adam sol jerde jylap, qatesin túsinip, kúná jasaýdy qoıyp, durys jolǵa túsken desedi.
Shynynda bizdiń qaısymyz joǵaryda atalǵan bes nárseni jasaı alady ekenbiz? Eshqaısymyz! Óıtkeni, qolymyzdan kelmeıdi. Qaýqarymyzdan tys. Biraq kúná jasaýdy jalǵastyra beremiz. Nelikten?
