MAQALDYŃ MAǴYNASY

Abylaı han bir merekede at útinde turyp,Buqar jyraýdań

"Qıly- qıly zaman bolar,

Qaraǵaı basyń shortan shalar"- degen sózdiń maǵynasyn bile almadym, ol ne degeni- dep surapty. Sonda Buqar jyraý kózine jas alyp, qamshysyn tizesine qoıyp bylaı depti:

- Eı, han, bul sózdi sen suramasań kerek edi, men aıtpasam kerek edi:

Hanǵa jaýap aıtpasam,

Hannyń kóńili qalady.

Qandyra jaýap sóılesem,

Halqym ne aıtady.

Han Abylaı, Abylaı!

Qaıǵyly mundaı habardy,

Suramasań netedi?

Suraǵan soń aıtpasam

Kisiligim ketedi.

Endi aıtaıyn tyńdasań,

Maǵan qahar qylmasań.

Qaraǵaı sýdan qashyp,

Shólge bitken bir daraq.

Shortan sýǵa shydamsyz

Balyqtan shyqqan bir qaraq.

Oılama shortan ushpas dep,

Qaraǵaıǵa shyqpas dep.

Kún batystan bir duspan,

Aqyrda shyǵar sol tustan.

Ózi sary, kózi kók,

Bastyǵynyń aty "pop"

Kúnshyǵysqa qaraıdy.

Shashyn almaı taraıdy.

Qudaıdy bilmes, dini joq,

Jamandyqta mini joq.

Osy syndy bir kápir,

Aýzy- basy jún kápir,

Jaıaýlap keler jurtyna,

Jaǵaly shekpen kıgizip,

Baldy jaǵar murtyńa.

Jemirlerge jem berip,

El qamyn aıtqan jaqsyny,

Sóıletpeı urar urtyna.

Baýyzdamaı isher qanyńdy.

Óltirmeı alar janyńdy,

Qaǵazǵa jazar malyńdy!

Esepke salar baryńdy,

Elińdi alar qolyńnan,

Áskerge qylar ulyńnan.

Teksizdi tórge shyǵaryp,

Basyna ol kún týǵanda,

Teńdik tımes qolyńnan,

Bul aıtqan sóz Abylaı

Bolmaı qalmas artyńnan,

Estiseń mine qartyńnań"- dep sózin aıaqtaǵanda Abylaı han bir kúrsinip, ókingen eken.

 

Raıhan MATAEVA-nyń

fb paraqshasynan