MEN - MUSYLMAN EKENMIN!..

Turaǵul: «1899 jyly maı aıynyń bas kezinde, Úlken aýylǵa (Dilda aýly) kelip edim, ákem meniń sálemimdi alar-almastan:

– Bıyl Syrtqa shyǵasyńdar ma? – dedi. Men:

– Túıemiz az, júgimiz syımaıdy ǵoı, – dedim.

– Olaı bolsa, men túıe jınap bereıin, jaılaýǵa kóshińder, – dedi. Sol arada syılas Esirkep degenge bir jigitti jiberdi. "Úsh-tórt túıe bersin, bizdiń Kishi aýyl (Aıgerim aýly) Syrtqa artyp shyǵady. Túıesin aqsatpaı, jaýyr qylmaı bergizemin", – dep jibergen jigiti baryp keldi de:

–  Túıem joq dep aıtady, – dedi… Bul Esirkep bizdiń Yrǵyzbaıdyń tórt balasynyń ishindegi eń azy, nashary Jortar degen kenje balasy bolady. Sol Jortardyń Arqat degen ulynyń eki balasynyń biri – Esirkep. Esirkepke ortasha dáýlet bitken soń, Jortar balalarynyń ergeninen qashyp, eki-úsh jyldan beri meniń ákemniń qasyn qystap, jaz bolsa jáne jaılap, kúzep júrýshi edi. Ákem álgi jaýapty estigen soń, azyraq úndemeı otyrdy da, azdan soń basyn kóterip:

– Iá, Qudaı! Bergenińe táýbe, men musylman ekenmin. Osy Esirkep Tákejannyń qasynda otyryp, Táńirberdi túıe suratyp jiberse, «Túıem joq!» dep aıta almas edi. "Bul túıemdi bermegenime Abaı ashýlanbaıdy ǵoı!"- dep, meniń minezimniń jumsaqtyǵyna senip, bermeı otyr ǵoı. Men - musylman ekenmin! – dep ákem qatty qýandy».

(Turaǵul Abaıulynyń «Ákem Abaı týraly» kitabynan alyndy)