Meniń ákem...
Men úshin, eki dúnıe sultany (s.ǵ.s.) jáne asyl anamnan keıingi, Allanyń eń qadirli pendesi jaıly qolyma qalam alyp jazyp otyrǵanyma ózimdi sheksiz baqyt sezinemin. Tánimniń árbir túıirshigi men boıyma bitken árbir jaqsylyǵy úshin oǵan qaryzdarmyn. Árıne, ákeme perzent retinde ózim oılaǵandaı jaqsylyq jasaı almaı júrmin. Ol úshin eń áýeli Alla Taǵalaǵa ıstıǵfar aıtyp keshirim tileımin. Biraq, sol kemshilikterimdi tolyqtyrýǵa jáne jaqsylyqtarymdy ákemniń kórip, aq batasyn berýin Alladan suraımyn. Myna jalǵanda ákeńniń janyńda júrýi – baǵa jetpes nyǵmet. Allaǵa shúkir, búginde ózim – áke, ákem – ata boldy.
Meniń ákem júregi keń, meıirban adam. Únemi aınalasyndaǵy bala-shaǵa, aǵaıyn-týys pen dos-jarandar aldynda úlken jaýapkershilik sezinetin jan. Ákem ár balasyna erekshe jaqyn, sózinen buryn is-áreketimen tárbıe beredi. Eń ǵajaıyp qasıeti óz ata-anasyna asa meıirbandyǵy. Qartaıǵan áke-sheshesine erekshe jumsaq, árbir sózderine muqııat bola bildi. Perzent retindegi paryzyn ótegendigine bir-aq mysal: atam men ájeme balasynyń shyr kóbelek bop qyzmet etip júrgenin kórý násip boldy.
Qudaı ákeme jumsaq júrek bergen. Bireýdiń qınalǵanyn kórse shydaı almaıdy. Lezde, qol ushyn berýde daıyn turady. Árıne, jumsaq júrek meıirimdi adamnyń belgisi. Paıǵambarymyz (s.ǵ.s.) jánnatqa kiretin adamdardyń biri «Jaqyn týysy men musylmanǵa jumsaq júrekti kisi» dep aıtqan. Ózim baıqaǵan taǵy bir qasıeti adam balasynyń minin aıtýdy bilmeıtin. Ár isi úshin ákesinen min estı berip, aralary sýyp ketken qanshama áke men balalar bar. Ákemniń ár bir qatemnen sabaq alsyn dep parasattylyqpen qaraýy meni qajet kezde batyl da senimdi qadam jasaýyma sep boldy desem artyq aıtpaǵanym.
Artyq sóz ákemniń tabıǵatyna jat. Myna zamanda qyzyl til, qyzyl shoqtan da qaýipti. Qazir qaıda qarasań da bir-biriniń ar-namysyn tildep jatqan adam. Ákemniń baýyrmaldyǵyna kisi qyzyǵady. Eki kúnniń birinde úıde aǵaıyn-týys. Árqaısysy ákemnen aqyl-keńes nemese kómek surap kelip jatady. Bireýiniń kóńili qalyp, qur qol qaıtqany bolmaǵan-aý sirá. Quran Kárimde: «Ári maǵan, men týylǵan kúni, qaıtys bolatyn kúni jáne qaıta tiriletin kúni amandyq bolady[1]», - degen aıat osyndaı ákeler jaıly bolar.
Ákem – jaqsy dos, berik qorǵan, senimdi joldas jáne qarapaıym taza júrek ıesi. Onyń boıyndaǵy kóp asyl qasıettiń biren-sarany bolsa-daǵy mende bolýyn jan-tánimmen qalar edim. Ákem sııaqty óz balalaryma jaqsy tárbıe berý meniń ákelik boryshym. Óıtkeni, balanyń qarny toq jáne kıimi bútin bolýynan da qajetti dúnıe – tárbıe. Ardaqty paıǵambarymyz (s.ǵ.s.): «Ákeniń perzentine bergen eń jaqsy syılyǵy – jaqsy ádep[2]», - dep aıtýynyń syry da osynda jatyr.
