Meshittegi «túngi aktsııadan» qur qalmańyz...

Jýyrda elimizdegi iri saýda dúkeni turmystyq zattarǵa túngi aktsııa uıymdastyrdy. Sondaǵy saýdasy: bir zat alsańyz – ekinshisin jarty baǵasyna satyp alasyz. Qaraqurym halyq, yǵy-jyǵy jurt. Túngi ekige deıin barsańyz – úlgerdińiz, áıtpese aktsııadan qur qalady ekensiz.

Pendemiz ǵoı, keıde osynaý bolmashy jeńildikter úshin jelpinip, jetip baratynymyzdy nesine jasyramyz?! Ol da durys qoı, turmys úshin, ómir úshin qajetti zattardy alýǵa tıispiz.

Bizdiń aıtaıyn degen oı basqa edi. Adam balasyna jylyna bir ret keletin, eki dúnıeniń qaıyrly sáti – Ramazan, onyń ishindegi qasıetti Qadir túni. Naǵyz jeńildik, naǵyz jetistik, naǵyz jeńis, mine, osy – Qadir keshi. Árıne, Jaratqannyń Qadir túnindegi jarylqaýyn, jeńildigin álginde aıtqan saýda dúkeniniń jeńildigimen ıakı túngi aktsııasymen salystyrý sanamyzǵa da kelmegen. 

Bizdiń nıet – Qadir túnindegi mol múmkindikten, teńdessiz saýaptan, sheksiz nyǵmetten, bir pendeniń búkil ómirine tatıtyn qulshylyqtan qur qalmaýǵa úndeý. Rasynda, Qadir keshiniń árbir sáti qadirli.

Paıǵambarymyzdyń (Allanyń oǵan salaýaty men sálemi bolsyn): «Alla Taǵalanyń myń aıdan qaıyrly túni bar, kim sol túnniń saýabynan, jaqsylyǵynan shet qalsa, barsha saýap, jaqsylyqtan qur qalady», – dep, bul túndi beıqamdyqpen ótkizbeýdi nasıhattaýynda úlken mán bar.

Qasıetti Qurannyń alǵashqy aıaty túse bastaǵan, túnderdiń tóresi – Qadir keshi – myń aıdan da qaıyrly. Bul túnde perishteler jerge túsip, jer betinde bereke ornaıdy. Júrekterge ıman uıalap, adamzat balasy erekshe izgi sezimge bólenbek.

Paıǵambarymyz Muhammed (Allanyń oǵan salaýaty men sálemi bolsyn) ósıet sózinde: «Alla Taǵala Qadir túnin meniń úmbetime syılyq etip bergen. Mundaı nyǵmet burynǵy úmbetke buıyrmaǵan», – dep, barsha musylman qaýymyna súıinshi habar jetkizgen.

Búgin Qadir keshinde meshitterimizde ýaǵyz aıtylyp, kópshilikpen namaz, Quran oqylady, jamaǵatpen duǵa jasalady. Keıbir meshitterde, máselen, Elordamyzda elimizdiń bas meshiti – «Áziret Sultanda», «Nur Astana», «S.Ǵylmanı» meshitterinde Quran hatym jasalady. Alla úıine kelip, jamaǵatpen birge jaqsylyqqa, izgilikke bólenip, duǵa jasaý – abzal amal. Qadir keshin izgi amaldarmen úıde de ótkizýge bolady.  

Iá, Ramazan – uly nyǵmetke bólenetin kez. Meshittegi ıgi sharalardan, salystyrmaly túrde aıtqanda, «túngi aktsııadan» qur qalmaýǵa shaqyramyz.

Alla barshamyzǵa jar bolǵaı!   

 

Aǵabek Qonarbaıuly