MÚBÁRAK MÁÝLIT MEREKESI
Máýlit meıramy Rýbıǵýl áýýal aıynda kiredi.
Adamzat tarıhynda eń uly – súıikti paıǵambarymyz hazireti Muhammed (Allanyń ıgiligi men sálemi bolsyn) dúnıege kelgen máýlit kúni jóninde Alla Taǵala Quran Kárimde:
«Eı, adamdar! Senderge óz aralaryńnan bir paıǵambar keledi. Sender taýqymetke ushyrasańdar – Oǵan aýyr tıedi. Ol senderdiń týra jolda bolǵandaryńdy qalaıdy, múminderge qushtar, óte janashyr» («Táýbe» súresi, 128-aıat), - degen.
Máýlit merekesinde ne úshin kóp salaýat aıtylady desek, oǵan Quran aıattary jaýap beredi. «Ahzab» súresi, 56-aıatynda: «Rasynda Alla, Paıǵambarǵa rahmet etedi. Jáne perishteler salaýat aıtady. Áı Múminder! Oǵan salaýat jáne yqylaspen sálem keltirińder», - dep aıtqan.
Máýlit arabsha «týylý», «týylǵan ýaqyty» degen maǵynalardy bildiredi. Paıǵambardyń (Allanyń ıgiligi men sálemi bolsyn) týǵan ýaqytyna baılanysty atap ótiletin kún «máýlit» dep atalady. Bul – dinde áý basta bolmaǵan, keıinnen engizilgen nárse. Áıtse de, kópshilik ǵulamalar máýlitti bıdǵat hasana, ıaǵnı quptarlyq jaqsy jańalyqqa jatqyzady. Oǵan naqtyly dálelderi de bar. Bul mereke Haq Elshisine degen erekshe súıispenshilikten týyndaǵany belgili.
Sol sebepti de, barsha musylman halqy Paıǵambarymyzǵa (Allanyń ıgiligi men sálemi bolsyn) qurmet retinde Máýlit merekesinde jer-jerlerdegi meshitterde Quran oqyp, kóptegen ýaǵyzdar aıtyp, salaýattar oqıdy. Máýlitti toılatý týrasynda ataqty ǵulamalar kóptegen pikirler qaldyrǵan. Kópshilikke tanymal, bedeldi ǵulama Imam Sýıýtyı: «Meniń pikirimshe, adamdardyń máýlittiń qurmetine jınalyp Quran oqýy, Muhammedtiń (Allanyń ıgiligi men sálemi bolsyn) paıǵambarlyǵy, dúnıege kelýi týrasynda áńgime etýi, ysyrapkershilikten saqtanyp as usynýy Alla elshisine (Allanyń ıgiligi men sálemi bolsyn) degen qurmet retinde jasalǵan ıgi ári saýapty is jáne qýanysh», – degen. Ábý Shama bul meıramǵa anyqtama berip: «Bizdiń dáýirimizdegi jaqsy amaldyń biri – máýlitti sadaqa berýmen, ýaǵyz aıtýmen jáne ózara jaıdary bolýmen ótkizý. Osynyń bári Paıǵambarymyzǵa (Allanyń ıgiligi men sálemi bolsyn) degen súıispenshilik pen qurmettiń ári Alla Taǵalaǵa bolǵan shúkirshiliktiń belgisi» degen.
Barsha musylmannyń súıiktisi bolǵan Paıǵambarymyzǵa (Allanyń ıgiligi men sálemi bolsyn) salaýat aıtyp, ózgelerge jaqsylyq jasaýdyń saýaby teńdessiz. Quran oqyp, Alla elshisiniń (Allanyń ıgiligi men sálemi bolsyn) ómiri men ónegesi jaıly kitap oqýdyń da musylmanǵa bereri mol. Máýlit merekesi kirgende ǵıbadattarymyz arttyryp, Allanyń razylyǵyna bólenýge múmkindik zor.
Hasan Ál-Basrı (r.a.): «Meniń Ýhýd taýyndaı altynym bolsa, ony Paıǵambarymyzdyń (s.ǵ.s.) máýlitin oqytýǵa jumsar edim»,– degen.
Alla Taǵala elimizge, jerimizge bereketin jaýdyryp, halqymyzdyń keń peıili men izgi nıetine saı birlik bersin!
Eki dúnıede de júzimizdi jarqyn, duǵamyzdy qabyl qylǵaı!
