NAMAZDA SAPTYŃ ARASY ALShAQ BOLSA, JAMAǴAT NAMAZYNYŃ SAÝABY BERILE ME?

 Jamaǵat namazy degenimiz – ımamnyń artynda turyp, paryz, ýájip, taraýyq namazdaryn oqý. Jamaǵat namazy – er kisiler úshin bekitilgen súnnet jáne saýaby óte úlken. Paıǵambarymyz (oǵan Allanyń salaýaty men sálemi bolsyn) «Jamaǵatpen oqyǵan namazdyń saýaby jeke oqyǵan namazdan jıyrma jeti ese artyq»[1], – degen.

Sondaı-aq jamaǵat namazyna qatysý nıetimen meshitke barǵan adamnyń árbir qadamyna saýap jazylyp, kúnási tógiledi. Elimizde karantın rejıminiń jumsarýyna baılanysty meshitterimizde jamaǵat namazy arnaıy sanıtarlyq talaptardy qatań saqtaı otyryp júzege asyp jatyr. Sol talaptardyń biri – namaz oqýshylardyń arasyndaǵy araqashyqtyq 1,5 metr bolýy tıis. Osyǵan oraı «bulaı oqylǵan namazǵa jamaǵat namazynyń saýaby berilmeıdi», «olaı oqý – bıdǵat» dep júrgender de bar. Jamaǵat bolyp namaz oqyǵanda saptyń túzý bolýy jáne arada ashyq jerdiń bolmaýy – namazdyń kórki ári kemeldigi. Ol jaıynda Paıǵambarymyzdan (oǵan Allanyń salaýaty men sálemi bolsyn) kóptegen hadıster kelgen.

  عن أبي هريرة - رضي الله عنه - أن رسول الله - صلى الله عليه وسلم - قال: (أقيموا الصف في الصلاة؛ فإن إقامة الصف من حسن الصلاة).

  Ábý Hýraıradan (oǵan Alla razy bolsyn) jetken hadıste Paıǵambarymyz (oǵan Allanyń salaýaty men sálemi bolsyn): «Namazda turǵanda sapty túzeńder. Óıtkeni sapty túzeý – namazdyń kórki», - dese, kelesi hadıste: «Saptaryńdy túzeńder, rasynda saptardy túzetý namazdy tolyqtyrady»[2], - degen.

 Namazda arada ashyq jerdiń bolmaýyn jumhýr (kópshilik) ǵalymdar mandýb amalynan degen. «Muhtasar ál-Ýıqaıa» kitabynda: «Aldyńǵy sapta bos oryn bola tura, artqy sapqa turý – makrýh»[3], - delingen.

Budan túsinetinimiz eshbir úzirsiz namazda tyǵyz turmaý makrýh bolady. Degenmen bul jaǵdaıdyń ózinde namazy buzylmaıdy. Óıtkeni namazda sapty túzep, arada bos oryn qaldyrmaý namazdyń rúkini ne sharty emes. Imam ál-Kasanı «Badaıǵ ás-Sanaıǵ» kitabynda: «Eger bir adam meshittiń bir buryshynda turyp, mıhrabta turǵan ımamǵa uıysa, namazy durys bolady. Óıtkeni meshit uzaqtyǵyna qaramastan bári bir oryn bolyp tabylady»[4], - degen.

 Iaǵnı ımamǵa uıý sharttarynyń biri ımam men jamaǵat bir orynda bolýy kerek. Sondyqtan indettiń tez taralý qaýpin eskere otyryp saptyń tyǵyz bolýyn ýaqytsha eskermeý makrýh bolmaıdy ári namaz da buzylmaıdy. Alla qalasa, jaqsy kúnder aldymyzda. Zárýlik jaǵdaıy ótkennen keıin sapta tyǵyz turý óz úkimine qaıta oralady. Siz ben bizdiń elimizdegi vırýstyń aldyn alýǵa baǵyttalǵan keshendi sharalardy qatań saqtaýymyzdyń nátıjesi burynǵy qalypty qulshylyqtarymyzdy tez arada qaıta jasaýǵa múmkindik týǵyzatynyn túsineıik. Ózimizge qamqorlyq ózgelerge qamqorlyq ekenin esten shyǵarmaıyq. Alla Taǵala jer betinen juqpaly indetti joıyp, meshitterimizdi jamaǵatqa toltyryp, berekeli, merekeli sátterde júzdesýdi jazǵaı! Elimiz aman, jerimiz tynysh, táýelsizdigimiz baıandy bolǵaı! Ámın!      

  [1] Imam Buharı, Mýslım.

[2] Imam Buharı, Mýslım.

[3] Muhtasar ál-Ýıqaıa

[4] Badaıǵ ás-Sanaıǵ  

Istochnık: http://fatua.kz/kz/post/view?id=991