Nekemen oınaǵandar túbinde ońbaıdy

Elden surar bir ótinishim bar edi. Nekemen, talaqpen, otbasymen oınamańyzdarshy, aǵaıyn. Búginde usaq-túıek nárselerge bola «ajyrasam» dep shyǵatyndar shekten tys kóbeıip barady. Allanyń neke degen uly sharıǵatyna jeńil qaraǵan adamnyń aqyrettegi jaǵdaıy ne bolmaq? Sony oılap kórdińizder me? Áıelin qorqytý úshin «ajyrasam» deıtinder de bar. Bizdiń meshitke qanshama adam etegi jasqa tolyp jylap, eńirep osy máselemen keledi. «Bala-shaǵamdy saǵynyp kettim» dep ákeler jylaıdy. «Kúıeýimniń qadirin bilmegen ekenmin» dep áıelder eńireıdi.

Ardaqty paıǵambarymyz (s.ǵ.s.) bir hadısinde bylaı degen: «Úsh nárseniń ázili, shyny bolmaıdy. Olardyń shyny da shyn, ázili de shyn. Olar: NEKE, TALAQ, ANT». Mine, bul hadıs barlyq erli-zaıyptylardyń qulaqtaryna altyn syrǵa. Endeshe, ajyrasý máselesinde «oınap edim», «ázildep edim», «jaı ánsheıin aıta salyp edim», «kúıeýimdi nemese áıelimdi qorqytaıyn dep edim» dep oılaý óte-móte qaýipti. Sondyqtan, oınaımyn dep ot basýdan saqtasyn! Bolmashy sebepterge bola «talaq», «talaq» dep aıtý jón emes. Óıtkeni ol shynymen de talaq bolyp qalady. Sóıtip adam óz jubaıymen zına jasap júrgenin bilmeıdy. Bul sózi úshin Allanyń aldyna barǵanda mindetti túrde jaýap beredi. Biz jetkizýin jetkizdik. Endi arǵy jaǵyn árkim ózi sheshe jatar.

Alla Taǵala elimizdegi otbasylardyń berik bolýyn násip etsin!

Asylbek Áýezhanuly