OL (S.Ǵ.S.) BIZDERDI SAǴYNYP JYLAǴAN...
Paıǵambar jiberý Allanyń ámirinde bolsa, oǵan ıman etý – pendeniń mindeti. Alla Taǵala adamzatqa júz myńdaǵan paıǵambar jiberip, Óz zańdylyqtaryn úıretti. Sol júz myńdaǵan paıǵambardyń sońǵysy Muhammed (s.ǵ.s.) búkil adamzat pen jyn ataýlyǵa jiberildi.
Ol (s.ǵ.s.) dúnıe esigin ashqanda búkil álem ózgeshe kúıge endi, onyń (s.ǵ.s.) nury kúlli ǵalamǵa sáýle bop tógildi. Hazireti Muhammedtiń (s.ǵ.s.) kelýimen kóńilderdi perdelegen qarańǵylyq serpilip, sanalardy tumshalaǵan tuman seıildi. Iman káýsaryna qanyqqandar jaratylystyń mánin uǵa bastady. Semip qalǵan júrekter jibip, qatyp qalǵan kóńilderge kóktem ornady, ol (s.ǵ.s.) ózine deıingi búkil paıǵambarlardyń joǵary qasıetteri men uly jolyn jalǵastyrýshy, tolyqtyrýshy ári támamdaýshy retinde keldi.
Allahtyń qudiretimen aıryqsha jaratylǵan jannyń týǵannan ómirden ótkenge deıingi ómirbaıanyn árbir musylman kókiregine túıip, kóziniń qarashyǵyndaı saqtaı bilse, nur ústine nur.
Musylman úmbeti Alla Taǵalanyń elshisin (s.ǵ.s.) jaqsy kórgeni sekildi Paıǵambarymyz (s.ǵ.s.) da úmbetin óte qatty jaqsy kórdi. Tipti, janyndaǵylardy sahabalarym dese, ózinen keıin keletin bizder men aqıretke deıingi keletin musylmandardy «baýyrlarym» dep ózine jaqyn tartqan.
Ardaqty Alla elshisi (s.ǵ.s.) bizderdi eske alyp: «Úmbetimnen meni qatty jaqsy kóretin jandar – menen keıin keletin adamadar. Tipti, olardyń bireýleri meni otbasy jáne mal-dúnıesimen birge kórýge yntyq»,[1] – dedi.
Iá, paıǵambarymyzǵa (s.ǵ.s.) úmbet bolǵan, júreginde oǵan degen súıispenshiligi bar árbir pendeniń osy dúnıedegi eń uly armany – bir ret bolsa da Onyń (s.ǵ.s.) nurly júzin kórý.
Degenmen, Allanyń jazmyshymen bul ómirde Alla elshisi Muhammadty (s.ǵ.s.) kórý bizderge násip bolmasa da, Jaratqan Iemiz aqyrǵy demimiz qalǵansha onyń (s.ǵ.s.) týra jolymen júrýdi, súnnetine ilesýimizdi násip etsin!
Alla elshisi (s.ǵ.s.) ózin kórgen sahabalardy da, ózinen aqıretke deıin keletin baýyrlaryn da qatty jaqsy kórgen. Ol (s.ǵ.s.) óte meıirimdi ári keshirimdi edi. Quran Kárimde Paıǵambarymyz Muhammedtiń (s.ǵ.s.) asqan meıirimdi, úmbetine janashyr ekendigin beınelep, úmbetiniń qınalǵany oǵan aýyr keletinin bildirip bylaı degen: «Rasynda, senderge aralaryńnan ardaqty bir paıǵambar keldi. Qınalǵandaryń oǵan aýyr tıedi. Senderge óte yntyq. múmınderge óte jumsaq, erekshe meıirimdi»[2].
Ábý Hýraıradan (r.a.) jetken hadıste: «Bir kúni Allanyń elshisi (s.ǵ.s.) qabirge kelip: «Allanyń sálemi bolsyn! Iman keltirgen qaýymnyń álemi! Alla qalasa, biz de senderge ilesermiz!» – dedi. Sosyn: «Baýyrlarymdy kórgim keldi», – dedi. Sonda (sahabalar): «Ýa, Alla elshisi! Biz Sizdiń baýyrlaryńyz emespiz be?» – dep surady. Ol (s.ǵ.s.): «Joq, sender meniń sahabalarymsyńdar, al baýyrlarymyz áli kelgen joq», – dedi. Sahabalary: «Ýa, Rasýlalla! Úmbetińizdiń keıin kelgenderin qalaı tanısyz?» – dep surady. Ol (s.ǵ.s.): «Eger qara tústi kóp jylqynyń ishinde bireýdiń mańdaılary qasqa, aıaqtary ala jylqysy bolsa, sol jylqylaryn tanymaı ma?» – dedi. Sahabalary: «Árıne, tanıdy, Rasýlalla!» – desti. Ol (s.ǵ.s.): «Olar Qııamet kúni dáret alýdyń áserinen mańdaılary men aıaqtary aq bolady. Men haýyzǵa (Káýsar bulaǵyna) olardan buryn baramyn. Sonda bir adamdar adasqan túıeniń qashqany sııaqty háýizimnen ári qýylyp, qashady. Men olardy: «Beri qaraı! Beri qaraı! Beri qaraı!» – dep shaqyramyn. Sol kezde «Olar senen keıin týralyqty adasýmen aýystyrdy», – degen daýys estiledi. Men sonda: «Aýlaq júrsin! Aýlaq júrsin!» – deımin»[3], – dedi».
Alla elshisi (s.ǵ.s.) saǵynyp, Káýsár bulaǵynyń aldynda kútetin baqytty jandardyń belgileri – júzderi men aıaqtary jarqyraıdy. Olardyń júzderi men aıaqtarynyń jarqyraýyna ne nárse sebep boldy? Árıne, dúnıe tirshiliginde Alla Taǵalaǵa qulshylyq etip, namaz oqý úshin erinbeı alǵan dárettiń septigi tıdi.
Qaısy bir pende dáretin alyp, bes ýaqyt namazyna berik bolsa, paıǵambar (s.ǵ.s.) saǵynǵan jandardyń qatarynan tabylary sózsiz. Sondaı-aq, taǵy bir hadıste: «Musylman ıakı múmın pende dáret alyp, betin jýsa, kózderiniń barlyq kúnási dáret sýymen nemese sýdyń sońǵy tamshysymen júzinen jýylyp ketedi. Eger qolyn jýsa, qolymen istegen ár kúnási dáret sýymen ıakı sýdyń sońǵy tamshysymen jýylyp ketedi. Eger aıaǵyn jýsa, aıaǵymen júrip istegen kúnálary dáret sýymen ıakı sýdyń sońǵy tamshysymen jýylyp ketedi. Pende osylaısha kúnálardan tazaryp arylady»[4], – dep súıinshilegen.
Sonymen qatar, joǵarydaǵy hadıste: «Bir adamdar adasqan túıeniń qashqany sııaqty háýizimnen ári qýylyp, qashady»,– delingen. Paıǵambarymyzdyń (s.ǵ.s.) Káýsár bulaǵynan adasyp, qýylǵan bul baqytsyz jandar kimder? Hadıstiń jalǵasynda: «Olar senen keıin týralyqty adasýmen aýystyrdy» degen jaýaby baıandalǵan.
Týralyqty adasýmen aýystyrǵandardyń qatarynda qoı terisin jamylǵan qasqyrdaı Quran men súnnetti jalaýlatyp aıdyń aman kúninde adasyp júrgenderdiń de qaralary tabylady.
Jalǵan jıhadqa shaqyryp, jastardyń sanasyn san-saqqa júgirtetin aǵymdarǵa Alla elshisi (s.ǵ.s.) «Aýlaq júrsin! Aýlaq júrsin!» – dep, olardan teris aınalatyndyǵyn, sirá, túsinbese kerek!
Oǵan (s.ǵ.s.) úmbetiniń qınalýy aýyr tıetin edi. Bir hadıste «Alla Taǵaladan bir perishte kelip, úmbetimniń jartysyn jannatqa kirgizý men aqırette shapaǵat etý arasynda tańdaýymdy usyndy. Men aqırette shapaǵat etýdi tańdadym. Shapaǵat óte keń ári jetkilikti. Sizder bul shapaǵat tek qana úmbetimniń taqýalaryna ǵana buıyrady dep oılaısyzdar ma? Ol úmbetimniń qatelik pen kúná istegenderine, kúnáǵa belshesinen batqandarǵa da», – dep jánnatqa úmbetiniń jartysy emes, shapaǵatymen barlyǵynyń kirýin qalaıdy.
Paıǵambarymyz o dúnıede úmbetinen keıbireýlerdiń óte qıyn jaǵdaıǵa tap bolyp, shapaǵatynan da maqurym qalatyndyǵyn sóz etedi. Bulaı bolýy olardyń kúnálarynyń aýyrlyǵynan bolsa kerek, sondyqtan aqırettiń aýyr jaǵdaıyna tap bolmaý úshin úmbetiniń tozaqqa túsýin qalamaıtyn Paıǵambarymyz «Meni uıatqa qaldyrmańdar» dep, mol ǵıbadat jasaýymyzdy eskertken.
Osylaısha óziniń úmbeti úshin kóz jasyn tógip, bizdi kórmese de saǵynyp, bizder úshin qııamette shapaǵatshy bolatyn uly tulǵany kelemejdep sýretin salyp, mazaqqa aınaldyryp, jıirkenishti sol isterin «sóz bostandyǵy» dep aqtalǵan dinimizge kúıe jaǵýshylarǵa qandaı ýáj aıtýǵa bolady?!
Ýa, asyl Paıǵambar (s.ǵ.s.) sen bizderdiń júregimizdesiń, seni saǵyndyq. Saǵan laıyqty úmbet bola almasaq, bizdi keshirgeısiń!
