Oqyǵan Namaz ǵoı bul Paıǵambarym

Namazym baǵasy joq mańdaı baǵym,
Tynyshtyq tappaq onsyz qaıdan janym?
Lúpildep júrek nury júzin jýyp,
Oqyǵan namaz ǵoı bul Paıǵambarym.

Óterde Alla aldynda minájatyn,
Alaýlap júzi keıde qýaratyn.
«Namazdyń kirgendigin súıinshilep,
Eı, Bilál, azan aıt!» dep qýanatyn.

Adam-ata, Haýa-ana urpaǵynan,
Ótken joq namazǵa odan yntaly jan.
Bappenen dáret alar múbárák tán,
Úzilip móldir monshaq shyntaǵynan.

Berilip Allasyna syr tókkende,
Etinen et kesse de bylq etken be?!
Jatty ǵoı basyn almaı jaınamazdan,
Jáhılder ústine ákep jyn tókkende.

Dushpanǵa duǵa tilep jábirlegen,
Imanǵa kelse eken dep qamyn jegen.
Surady ne surasa jalǵyz Haqtan,
Namazben jáne uly sabyrmenen.

Sap túzep sahabalar qushyr alǵan,
Ol namaz bar musylman úshin arman.
Er Omar namazǵa uıyp turǵan kezde,
Jebeniń etke kirgen ushyn alǵan.

Tolqytpas, tebirentpes qalaı jandy?
Aspanym Alla súıip araılandy.
Namazyn qaza qylmaı qan maıdanda,
Japyrǵan babalarym talaı jaýdy.

Kelgen jan Qudaı ońdap táýbasyna,
Namazben muńyn shaǵar Allasyna.
Kúnderdiń kúni jeter muratyna,
Túsip ap aqqan sýdaı arnasyna.

Dúnıeniń qyzyl-jasyl desi basyp,
Baılyqty dep júr bireý – osy baqyt.
Máńgilik aldyndaǵy sát qana ǵoı,
Rahattyń ýaqyttyq nesi baqyt?
Mazasy bolmaıdy eken
kim bolsa da,
Namazy bolmasa eger bes ýaqyt.

Tek tirlik kúıigine kúıgen qandaı?
Ardaqtap Alla qulyn súıgen qandaı!?
Bıiktep ketedi eken barlyǵynan,
Eńkeıip sájdege kep tıgen mańdaı.

Shirkin-aı,
Shyn musylman qandaı bolar?
Qulshylyq lázzatyna qanbaıdy olar.
Eshqashan, eshteńege, eshteńege,
Namazyn aıyrbasqa salmaıdy olar.
Osynaý dúnıeniń bar baılyǵyn,
Atyna jazyp berseń de almaıdy olar.

Sózim sol basynda aıtqan «baǵa joq» dep,
Sóz emes sezinbeseń sana jetpek.
Sezinseń munsha baılyq, munsha syıdy,
Ystyq jas jaınamazǵa tamady eptep.

Osynaý san alapat jumyr jerde,
Musylman pana tappaı túńilgen be?
Namazyń seıiltedi qaıǵy-muńnan,
Mánine máńgiliktiń úńilgende.

Basynan ótpeı turyp jalǵan myna,
Kez bolǵaı «Allam» degen armandyǵa.
Alladan adamzatqa túsken paryz,
Ardaqty Paıǵambardan qalǵan mura!

Ularbek Nurǵalym