OTBASY MÚShELERINIŃ BIR-BIRINIŃ ALDYNDAǴY MINDETTERI
Otaǵasynyń mindetteri; áıelimen tatý bolý, oǵan qorǵan bolý, nápaqasyn taýyp, sadaqasyn úzbeý. Bir hadıste “Senderdiń eń qaıyrlylaryń áıeline qaıyrly bolǵany” deıdi. Basqa bir hadıste “Áıelderge tek minezi artyqtar qolyndaǵysyn beredi, jaman minezdiler bolsa, qııanat jasaıdy” degen.
Áıeldiń basty mindetteri; kúıeýiniń sharıǵatqa saı buıyrǵandaryn oryndaý, ary men abyroıyn qorǵap, kúıeýine adaldyq tanytý, barǵa qanaǵat etip, ysyraptan saqtaný.
Balanyń áke men ana aldyndaǵy basty mindetteri; ata-anaǵa qurmet kórsetý, olardyń sharıǵatqa saı buıyrǵandaryn oryndaý. Balanyń dúnıege kelýine sebep bolǵan, olar es bilip, eseıgenshe mahabbat, meıirin tógip ósirgen ata-anaǵa ‘túý’ dep qarsy sóıleýdiń ózi jaıyz emes. Ákesine, anasyna qaramaıtyn, olardyń sharıǵatqa laıyq talaptaryn tyńdamaıtyn, olar muqtaj bolǵanda kómekke umtylmaıtyn bala qaıyrly urpaq bolý qurmetinen maqrum qalady, Alla Taǵalanyń azabyna laıyq bolady.
Qurmetti birinshi ákege, al kómekti birinshi anaǵa kórsetý kerek. Ananyń haqy ákemen salystyrǵanda, eki ese. Bir hadıste “Jánnat analardyń tabanynyń astynda” deıdi.
Qaıyrly urpaq tek ata-anasyna ǵana emes, olar dúnıeden ótken soń, olardyń dostaryna syı-qurmetin kórsetedi. Óıtkeni bul da ata-anaǵa qurmetke teń.
Baýyrlardyń basty mindetteri; birin-biri jaqsy kórý, bir-birine kómektesip, qurmet, meıirimderin aıamaý. Baýyrlardyń arasynda ajyramas baılanys bolýǵa tıis. Materıaldyq paıda úshin aralarynda kıkiljiń oryn almaýy kerek.
